«Շնորհավոր Ամանոր, մայրեր» լիրիկական կոմեդիայի պրեմիերան կկայանա այսօր՝ «Մոսկվա» կինոթատրոնում: Ֆիլմի վրա ծախսվել է վեց միլիոն դոլար, իսկ արտադրության վրա՝ երկու միլիոն դոլար:
Հինգ նովելից բաղկացած ֆիլմի ամեն մասը նկարահանել է մեկ ռեժիսոր՝ Արտեմ Ակսենենկոն, Սարիկ Անդրեասյանը, Անտոն Բորմատովը, Դմիտրի Գրաչովը, Կլիմ Պոպլավսկին:
Սարիկ Անդրեասյանի նկարահանած «Փարիզ» նովելում խաղում են Ալեն Դելոնը, Իրինա Ռոզանովան, Պավել Վոլյան: Ռեժիսորի խոսքերով՝ ամենատպավորիչը եղել են Ֆրանսիայում նկարահանումները, երբ Ալեն Դելոնը ծաղիկներ է բերել խաղընկերուհուն:
Իրինա Ռոզանովան նույնպես Հայաստանում է: Այսօր լրագրողների հետ հանդիպման ժամանակ նա ասել է, որ այդ ամենը երազ էր, մեկ օր աշխատել են միասին, էմոցիոնալ և վառ օր է եղել: Բայց դերասանուհու մոտ մի դրվագ է ամենաշատը տպավորվել. «Երբ ես անհանգստանում էի իմ արտաքինի համար, այս մեծ մարդուն, հրաշալի դերասանին գրիմ անելու կանչեցին, և նա ասաց. «Ինձ գրի՞մ, 33 տարեկան հասակում ես ամենագեղեցիկ տղամարդն եմ եղել, իսկ հիմա սրանք իմ կնճիռներն են, իմ մազերը»: Ես այդ իմաստությունը, որպես դերասանուհի, ուզում եմ պահել ինձ, այդ թանկ խոսքերը: Որքան էլ վիրավորական լինի Ալեն Դելոնի համար, սակայն ինձ գեղեցկատեսները դուր չեն եկել, բայց բանն այն է, որ նա ինձ հիմա ավելի շատ է դուր գալիս, քան երիտասարդ տարիներին»։
Ալեն Դելոնի խոսքերով՝ այս ֆիլմն առանձնահատուկ է հենց սյուժեի առումով, նաև այն մոր թեման է բարձրացնում, այսօր իր մայրը 100 տարեկան կլիներ, և ինչի հասել է մինչև հիմա, մոր շնորհիվ է հասել, և ինչ արել է, արել է մոր համար:
Ռեժիսոր Սարիկ Անդրեասյանն էլ նշել է, որ եթե մարդն ուզում է փոխել աշխարհը, պետք է սկսի իրենից: Այսինքն՝ այսպիսի ֆիլմերով աշխարհը կարող ենք փոխել դեպի լավը, և եթե որևէ մեկը ֆիլմը դիտելուց հետո կզանգի մորը, կամ տեսակցության կգնա, դա կնշանակի, որ հասել ենք նպատակին: Նրա խոսքերով՝ թեև հայերն ու ռուսները տարբեր մշակույթներ ունեն, սակայն ինչ վերաբերում է զգացմունքներին, ապա դրանք նույնն են գրեթե բոլոր ազգերի համար: «Մամա»-ն բոլոր լեզուներով «մամա» է հնչում, և ըստ նրա, մեծ հաշվով արդեն ժամանակն է այս սահմանները վերացնելու:
Պատասխանելով այն հարցին, թե ինչպես է մեկ րոպեն անցնում Երևանում, Ալեն Դելոնն ասել է. «Ես այստեղ րոպեները չեմ հաշվում։ Երբ ամբողջ դահլիճում կանայք են, ես րոպներ չեմ հաշվում»։
