Այսօր Երեւանում մեծ ֆուտբոլային օր է, մեծ սպասման օր: Առանց կասկածի կարելի է ասել, որ գրեթե ամբողջ Հայաստանի եւ համայն հայության ուշադրությունը բեւեռված է լինելու Երեւանի «Հանրապետական» մարզադաշտի վրա, որտեղ այսօր ժամը 19-ին Հայաստանի հավաքականը «Եվրո-2012»-ի ընտրական մրցաշարի շրջանակում հյուրընկալելու է Ռուսաստանի հավաքականին:
Ռուսաստանը գլխավորում է մրցաշարային աղյուսակն իննը միավորով, իսկ Հայաստանը յոթ միավորով երկրորդ տեղում է: Հաղթանակի դեպքում մեր թիմը կարող է հայտնվել առաջին տեղում եւ հիանալի հնարավորություններ ստանալ Եվրոպայի առաջնության եզրափակիչ փուլի ուղեգիր նվաճելու համար, ինչն աննախադեպ հաջողություն կլինի հայկական ֆուտբոլի համար: Խաղը սպասվում է մեծ հետաքրքրությամբ: Հայաստանում անասելի ոգեւորիչ սպասումներ են, իսկական ազգային միասնականության մթնոլորտ:
Անկախ քաղաքական հայացքներից, անկախ անձնական համակրանքներից եւ հակակրանքներից` այսօր Հայաստանի քաղաքացիները մեկ միասնական օրգանիզմ են, այսօր բոլորս ունենք մի նպատակ` աջակցել մեր հավաքականին, լինել մեր ֆուտբոլիստների կողքին կամ ֆիզիկապես` ստադիոնում, կամ մտքով ու հոգով` հեռուստաէկրանների առաջ, եւ համոզված ենք, որ այդ համազգային աջակցության էներգետիկան կօգնի մեր ֆուտբոլիստներին տանել այն կարեւորագույն հաղթանակը, որին սպասում ենք բոլորս, եւ որը կարող է շրջադարձային լինել շատ առումներով:
Մենք հավատում ենք հայ ֆուտբոլիստներին, մենք բոլորս աջակցում ենք նրանց, Հայաստանի ֆուտբոլի ֆեդերացիային, բոլորին, ում անմիջական աշխատանքից է այսօր կախված Հայաստանի հավաքականի հաջողությունը: Դա բոլորիս անհրաժեշտ հաջողություն է, դա Հայաստանի Հանրապետությանը անհրաժեշտ հաջողություն է, երկար սպասված հաղթանակ է, որին պետք է ուղղենք մեր բոլորիս ֆիզիկական կամ հոգեւոր ուժը: Եվ դա լինելու է ազատության հաղթանակը, որովհետեւ Հայաստանի հավաքականը հենց ազատ, անկաշկանդ, թեթեւ խաղով պետք է հաղթի ռուսներին, դա է լինելու հաղթանակի գրավականը: Հաղթանակ մեր թիմին, հաղթանակ բոլորիս:
