Ֆրանսիայի ոստիկանությունը խուզարկել է Փարիզի խոշորագույն Aviation club de France խաղատունը: Գործողության արդյունքում տասից ավելի մարդ է ձերբակալվել: Հնարավոր է՝ նրանց առաջադրվեն ֆինանսական միջոցների լվացման, չգրանցված աշխատուժի օգտագործման, վստահության չարաշահման մեղադրանքներ: Այս մասին հայտնում է ITAR-TASS-ը՝ հղում անելով տեղի ԶԼՄ-ներին:
Ձերբակալվածների թվում է խաղատան տնօրենը՝ 45-ամյա Մարսել Ֆրանսիցին: Նա կորսիկացի խոշոր քաղաքական գործիչ է՝ Հարավային Կորսիկայի դեպարտամենտի գերագույն խորհրդի փոխնախագահը: Նա համարվում է նաև «Ազգային շարժման աջակցության միություն» աջ կուսակցության հայտնի դեմք և Հարավային Կորսիկայում գլխավորում է ինչպես դրա գրասենյակը, այնպես էլ՝ «Նիկոլա Սարկոզիի ընկերների միության» տեղի գրասենյակը:
Ֆրանսիական ԶԼՄ-ներն այդ կապակցությամբ ուշադրություն են դարձնում, որ Ֆրանսիցիի ձերբակալությունը հաջորդել է տեղեկությունների հայտնվելուն, որ Սարկոզին առաջիկա օրերին կարող է վերադառնալ մեծ քաղաքականություն՝ այդպիսով «Ազգային շարժման աջակցության միության» առաջատար դեմք դառնալով:
Այն, որ ոստիկանական գործողությունը կարող է քաղաքական հիմք ունենալ՝ հաստատում է նաև այն, որ Aviation club de France-ում խախտումների մասին գործը վարում են դատավորներ Կլեր Տեպոն և Սերժ Տուրները, որոնց աջ շրջանակները բազմիցս քննադատել են՝ պնդելով, որ նրանք դիտավորյալ քրեական հետապնդում են իրականացնում մի շարք աջ քաղաքական գործիչների նկատմամբ՝ այդպիսով կատարելով երկրի սոցիալիստական ղեկավարության պատվերը:
