«Քառյակը ոստիկանապետի հրաժարականի հարց չի քննարկել: Վերջին նիստում էլ ոստիկանապետի հարցը ընդհանրապես չի քննարկվել: Սա նորություն է մեզ համար»,- «Առաջին լրատվական»-ի հետ զրույցում ասաց ԱԺ «Ժառանգություն» խմբակցության քարտուղար Թևան Պողոսյանը՝ պատասխանելով հարցին, թե քառյակի անդամ կուսակցությունները կիսո՞ւմ են ՀԱԿ-ի մոտեցումը, որը պատրաստվում է պահանջել ոստիկանապետի հրաժարականը՝ հաշվի առնելով նրա վերջին հայտարարությունները:
«Միգուցե ՀԱԿ-ը ունի այդ նախաձեռնությունը և հաջորդ նիստին կբերի օրակարգ: Երբ բերվի, դրվի քննարկման, այդ ժամանակ էլ կներկայացնենք մեր մոտեցումը»,- ասաց նա:
Ամեն դեպքում՝ ինչպիսի՞ն կլինի «Ժառանգության» մոտեցումը, եթե այդ հարցը դրվի քննարկման՝ հարցին կուսակցության քարտուղարը պատասխանեց. ««Ժառանգության» մոտեցումն այնպիսին է, որ մենք կողմնակից ենք համակարգային, ամբողջական փոփոխություններին, և դա չի վերաբերում մեկ անձի կամ մեկ պաշտոնյայի»:
ԱԺ ՀՅԴ խմբակցության անդամ Արծվիկ Մինասյանը ևս փաստեց, որ քառյակը նման հարց չի քննարկել և անգամ քառյակի նիստ էլ չի հրավիրվել այդ օրակարգով:
Հիշեցնենք, որ այսօր ՀԱԿ առաջնորդ Լևոն Տեր-Պետրոսյանի խոսնակ Արման Մուսինյանն իր ասուլիսի ժամանակ ասել է, որ առաջիկայում ոչ իշխանական ուժերը կփորձեն խորհրդարանում բարձրացնել ոստիկանապետի հրաժարականի հարցը: Իսկ պատճառը օրերս Արզնի օդակայանում անցկացված զորավարժությունների ժամանակ ոստիկանապետ Վլադիմիր Գասպարյանի արած հայտարարություններն են՝ քաղաքական ուժերին «սառը ցնցուղ» և էլ ավելի թեժ աշուն խոստանալու մասին, որով, ըստ Մուսինյանի, փորձ է արվել վախեցնել հասարակությանը փողոց դուրս գալու հեռանկարից:
Բացի այդ, Գասպարյանը նաև այդ օրը խոստովանել էր, որ Մարտի 1-ին նրա ղեկավարած կառույցը՝ ռազմական ոստիկանությունը, ներգրավված է եղել տեղի ունեցած գործընթացներին և զբաղված է եղել կառավարական շենքի պաշտպանությամբ:
«Վլադիմիր Գասպարյանը գերազանցել է իր լիազորությունները, և կարծում եմ, որ ոչ իշխանական ուժերը նաև կփորձեն խորհրդարանում բարձրացնել նրա հրաժարականի հարցը»,- ասել էր Մուսինյանը:
