ՀԱԿ մամուլի խոսնակ Արման Մուսինյանն այսօր ասուլիսին անդրադարձավ նաև օրերս «Արզնի» օդանավակայանի տարածքում ոստիկանության զորքերի զորավարժությունից հետո ոստիկանապետ Վլադիմիր Գասպարյանի՝ «թեժ աշնան» կողմնակիցներին «սառը ցնցուղներ» խոստանալուն, իսկ եթե դա էլ չօգնի՝ «ավելի թեժ աշուն» խոստանալուն:
Արդյոք սպառնալիք չէ՞, որ կկրկնվի Մարտի 1-ի սցենարը: Այս հարցին Մուսինյանը պատասխանեց, որ ոստիկանապետի ասածը խայտառակություն էր, և եթե դրանով փորձում են վախեցնել հասարակությանը փողոց դուրս գալու հեռանկարից, ապա, ըստ Մուսինյանի, նրանք չարաչար սխալվում են, քանի որ ժողովուրդը երբեք չի վախեցրել փողոց դուրս գալուց: Երկրորդ՝ ժողովուրդը գիտի և տեսել է, որ ժողովրդին հրապարակ բերող քաղաքական ուժերը երբեք չեն շեղվել օրինականության ուղուց, իրենց քաղաքական բողոքը մշտապես արտահայտել են սահմանադրության և օրենքի շրջանակներում: Ավելին՝ այս սպառանալիքը շատ ավելի մատնում է իշխանության վախն ու խուճապը:
Բացի դրանից՝ Արման Մուսինյանը նշեց, որ գործող ոստիկանապետը, ըստ էության, մի շարք խոստովանություններ է արել, որ Մարտի 1-ին նրա ղեկավարած կառույցը ներգրավված է եղել այդ գործընթացներին, զբաղված է եղել կառավարական շենքի պաշտպանությամբ, երկրորդ՝ սպառնալիքներ հնչեցնելով թեժ աշնան վերաբերյալ, ըստ էության, հայտարարել է, որ ինքը քաղաքական կողմնորոշում ունի, մինչդեռ նրա գործառույթը պետք է լինի հասարակական կարգի պահպանումը:
«Այս սպառնալիքով, ըստ էության փորձելով ասել, որ հասարակական բողոքները կճնշվեն, Վլադիմիր Գասպարյանը գերազանցել է իր լիազորությունները, և կարծում եմ, որ ոչիշխանական ուժերը նաև կփորձեն խորհրդանանում բարձրացնել նրա հրաժարականի հարցը»,- հավելեց նա:
Լուսանկարը՝ Pan Photo-ի
