Օրեր առաջ «Նուբարաշեն» ՔԿՀ-ում ոտքերը մեխած և բերանը կարած դատապարտյալ Արթուր Սմբատյանի վիճակը նորմալ է: Այս մասին «Առաջին լրատվական»-ի հետ զրույցում տեղեկացրեց Քրեակատարողական հիմնարկների վարչության մամուլի խոսնակ Գոռ Ղլեչյանը: Նա տեղեկացրեց, որ ինքնախեղման դեպքի նույն օրը ինքնախեղման միջոց հանդիսացած կարերը հանվել են:
Ըստ Գոռ Ղլեչյանի՝ դատապարտյալը պահանջում էր ընդգրկվել մետադոնային բուժման ծրագրում:
«Ծառայողական քննություն է ընթանում, որից հետո պարզ կդառնա` ընդգրկվո՞ւմ է նա մետադոնային ծրագրում, թե՞ ոչ»,- ասաց Գոռ Ղլեչյանը:
Հիշեցնենք, որ օրեր առաջ «Նուբարաշեն» քրեակատարողական հիմնարկի (ՔԿՀ) աշխատակիցները դատապարտյալ Արթուր Սմբատյանին հայտնաբերել էին բերանը կարած և ոտքերը մեխած վիճակում:
Նշենք, որ ժամանակ առ ժամանակ դատապարտյալը և նրա մայրը՝ Ռոզա Սարդարյանը, բողոքում են, որ տարբեր պատճառաբանություններով ՔԿՀ-ի ղեկավարությունը մերժում է դատապարտյալին ընդգրկել «Մետադոն» ծրագրում: Այդ ծրագրում ընդգրկված անձը պարտավորվում է բուժման ողջ ընթացքում առանց բժշկի նշանակման չօգտագործել որևէ թմրամիջոց կամ հոգեմետ դեղ: