Ֆրանսիայում Վատիկանին պատկանող ավտոմեքենայում հայտնաբերվել է կոկաին և մարիխուանա: Այս մասին հաղորդու մ է RTL ռադիոկայանը:
Ըստ այդ տեղեկության՝ Շամբերի քաղաքի մոտ ՝ մայրուղու վճարման կետերից մեկում մաքսային աշխատակիցները մեքենայում հայտնաբերել են 4 կգ կոկաին և 200 գրամ մարիխուանա: Մեքենայում եղել է Իտալիայի երկու քաղաքացի (30 և 40 տարեկան), որոնց ոստիկանությունը ձերբակալել է:
Ռադիոկայանի տվյալներով՝ իտալացիների մոտ դիվանագիտական անձնագրեր չեն եղել, և ոչինչ չի մատնանշում այն, որ նրանք որևէ կապ ունեն Վատիկանի հետ:
Ոչ պաշտոնական տեղեկությունների համաձայն, դիվանագիտական համարանիշվներով Mercedes մակնիշի ավտոմեքենան պատկանում է 91-ամյա Խորխե Մարիա Մեխիային, որը զբաղեցնում է Վատիկանի պատվավոր գրադարանավարի պաշտոնը:
Ռադիոկայանը հայտնում է, որ ավտոմեքենան մի քանի օր առաջ վերանորոգման է ուղարկվել իտալացի 2 մեխանիկների մոտ: Ըստ ամենայնի՝ վերջիններս դրանով մեկնել Իսպանիա և թմրանյութեր գնել՝ կարծելով, որ դիվանագիտական համարանիշերով մեքենան ոչ ոք չի խուզարկի:
