Մարտի 25-ին Սիրիայում շարունակվել են բախումները հակակառավարական ուժերի և իրավապահների միջև: France Presse գործակալության փոխանցմամբ, 10 մարդ զոհվել է:
Այս տվյալները լրագրողներին է հայտնել Սիրիայի բարձրաստիճան մի պաշտոնյա, ով ցանկացել է չներկայանալ: Նա ասել է, որ բախումները տեղի են ունեցել Դարա’ա քաղաքից ոչ հեռու գտնվող Սանամեն գյուղում: Նա այլ մանրամասներ չի հայտնել:
Al-Jazeera-ն երեկ հաղորդել էր, որ Սանամենում կրակ է բացվել այն ժամանակ, երբ տեղի բնակչությունն ուղղվել է դեպի Դարա’ա քաղաք` մասնակցելու բողոքի զանգվածային ակցիաներին: Նույն աղբյուրը նաև հաղորդում է, որ կրակ է բացվել նաև Դարա’այի ցուցարարների վրա, սակայն զոհերի թվի մասին տեղեկություններ չեն հաղորդվում, թեպետ հայտնի է, որ դրանք եղել են:
BBC-ն հաղորդում է, որ վերջին օրերին Սիրիայի հարավում զոհվել է առնվազն 55 մարդ: Հեռուստաընկերությունը նաև տեղեկացնում է, որ Սանամենում զոհվել է 10-25 մարդ:
Հիշեցնենք, որ բախումները Դարա’այում սկսվել են մարտի 18-ին: Երկրի հարավ են ուղղվել զինված ուժերի մի շարք ստորաբաժանումներ:
Տեղեկացնենք նաև, որ երեկ ցույցերը տարածվել են երկրով մեկ. բողոքի ակցիաներ են տեղի ունեցել նաև մայրաքաղաք Դամասկոսում:
