Օրեր առաջ Orange-ը հայտարարեց Հայաստանում iPhone 5-ի պաշտոնական վաճառքի մեկնարկի մասին: Սակայն մինչ այդ էլ մեր երկրում՝ «սև շուկայում» արդեն վաճառվում էր Apple-ի նորագույն արտադրանքը: Որքանո՞վ է «սև շուկան» խանգարում iPhone 5-ի պաշտոնական վաճառքին, և որքանո՞վ է Orange-ի առաջարկած գինը մրցունակ: Ընկերության ներկայացուցիչն «Առաջին լրատվական»-ի հետ զրուցում նշեց, որ թեև նախքան սարքերի պաշտոնական վաճառքի մեկնարկը «սև շուկան» արդեն որոշ չափով գրավել էր գնորդներին, սակայն Orange-ի գները «մրցունակ» են, և իրենք վաճառքի ծավալներից չեն դժգոհում:
Orange-ի ներկայացուցիչը հայտնեց, որ iPhone 5-ի գործառույթները ՀՀ-ում լիովին գործում են, սակայն սահմանափակ է LT4G ֆունկցիան, որը ծրագրավորված է նաև արտադրողի կողմից, քանի որ, եթե նույնիսկ ՀՀ-ում գործեր LT4G ցանցը, Apple-ը ինքն է որոշում՝ որ ցանցում գործեն իր iPhone-ները:
Նշենք, որ iPhone 5-ն ամենաբարակ և ամենաթեթև iPhone-ն է։ Orange-ում iPhone 5 16 ԳԲ մոդելը կարելի է ձեռք բերել 390 հզ. դրամով, 32 ԳԲ մոդելը` 450 հզ. դրամով և 64 ԳԲ մոդելը` 515 հզ. դրամով:
