Սևամորթների իրավունքների պաշտպանության ասոցիացիան (CRAN) սուր քննադատության է արժանացրել Ֆրանսիայի գեղեցկության մրցույթի ժյուրիի ընտրությունը, որտեղ հաղթող էր ճանաչվել բժշկական ֆակուլտետի ուսանողուհի 19-ամյա Մարին Լորֆելենը: Այս մասին գրում են արտասահմանյան ԶԼՄ-ները՝ հղում կատարելով France24-ին:
CRAN նախագահ Լուի-Ժորժի Թինի կարծիքով՝ Բուրգունդիայի բնակչուհին «շատ սպիտակամորթ է» և չի կարող ներկայացնել երկրի բնակչության բազմազանությունը, որի զգալի մասն աֆրիկյան ծագում ունի: Կազմակերպության հայտարարության մեջ ցավով նշվում է, որ «Միսս Ֆրանսիա-2013»-ը «ձյան նման ճերմակ է»:
ԶԼՄ-ները տեղեկացնում են, որ մրցույթի եզրափակիչ փուլ դուրս եկած 33 թեկնածուներից 8-ը ներկայացնում էին էթնիկ փոքրամասնություններին: Նրանց մեջ կար նաև մեկ մուսուլման:
Նշենք, որ Ֆրանսիայում այժմ 5 միլիոն մուսուլմաններ են ապրում, որոնց մեծ մասն հյուսիսաֆրիկյան ծագում ունի:
