«Առաջին լրատվական»-ի զրուցակիցն է քաղաքացիական ակտիվիստ Վաղինակ Շուշանյանը:
-Խոսել էիք ԱԺ ոչ իշխանական քառյակի, քաղաքական ուժերի հետ համագործակցության մասին։ Արդյո՞ք նախաձեռնությունը քաղաքականացվում է, թե՞ սա միայն առաջին հայացքից ստացված տպավորություն է:
-Սրանք առաջին հայացքից տպավորություններ են, բայց չկա այդպիսի բան, 100 տոկոսանոց հերքումով կարող եմ ասել: Մեր հայտարարության մեջ եղել է այսպես. «Մենք նախատեսում ենք համագործակցություն ԱԺ ոչ իշխանական 4 ուժերի՝ քառյակի հետ իրենց ներկայացրած 12+1 կետերի համատեքստում, քանի որ իրենց այդ կետերը, ինչպես գիտենք, բոլորիս էլ վերաբերում են. դրանք կլինեն էլեկտրաէներգիայի թանկացման վերաբերյալ՝ այս հարցի վերաբերյալ ունեն առանձին 6 կետանոց հատված, թե կլինի կենսաթոշակայինի, թե արագաչափերի, կարմիր գծերի տույժ-տուգանքների մասին, ընդհանրապես բոլոր կետերը մեր կոնտեքստում են: Այնպես որ, մենք չենք միանում ու չենք քաղաքականացվում, իսկ համագործակցության մասին զուտ պաշտոնական հայտարարություն էլ չի եղել, քանի որ պայմանավորվածություններ էլ դեռ չունենք: Պաշտոնապես կհայտարենք, երբ որ հանդիպումները տեղի կունենան, համագործակցության քայլերը կգտնենք:
Ինչ վերաբերում է էլեկտրաէներգիային՝ 6 կետերի մեջ պարունակվում են բոլոր մեր պահանջները: Էլէկտրաէներգիայի մասով մեր 8 կետանոց պահանջներից 2 չեն մտնում նրանց կետերի մեջ: Դրանցից մեկը հանձնաժողովի՝ ՀԾԿՀ-ի լիզորությունները վերանայելն է, քանի որ իբր իրենք անկախ էին, բայց չստացվեց. որ այդպես է՝ կարելի է հետազոտել: Նոր հանձնաժողովի ստեղծման պահանջ ունենք մենք, և 2-րդ գլխավոր պահանջը իշխանություններին՝ այլընտրանքային էներգիա ստանալու աղբյուրների ստեղծումն է էներգետիկ անկախության համար, քանի որ ՀԷՑ-ը պատկանում է Ռուսաստանին, ջերմակայանների մեծամասնությունը՝ ֆրանսիական, արտասահմանյան կազմակերպությունների ու այն էլ՝ մեր երկրում:
Մեր հողի վրա ստեղծում ենք հոսանք, ծախում ենք մեզ վրա, մի բան էլ՝ թանկացված գներով: Անցած տարի 40 տոկոսով թանկացավ, այս տարի 10 տոկոսով: Շատ հավանական է՝ կթանկանա նաև մյուս տարի, եթե, իհարկե, ժողովուրդը ձայն չհանի ու կուլ գնա՝ մտածելով. «Թքած էդ 4 դրամի վրա, մեկ ա՝ բան չի փոխվելու այս երկրում»: Բայց պետք է մարդկանց մեջ արթնանա այն գիտակցությունը, որ եթե ասեն՝ ոչինչ չի փոխվելու, իսկապես չի փոխվի: Ամեն մարդ պիտի սկսի իրենից, պիտի ասի, որ կարող է փոխվել և փոխել այս ամենը, այդ դեպքում կունենանք մտավոր զարգացվածությամբ, համախմբված, բարձր հասարակություն, որը պահանաջատեր կլինի և թույլ չի տա իր իրավունքները մեր իշխանությունները ոտնահարեն:
-Ասել էիք, թե չեք խոստանում, որ աշունը թեժ է լինելու, բայց խոստացել էիք թեժացնել, կոնկրետ ի՞նչ գործողություններ եք կատարելու: Ակցիաներ լինելո՞ւ են, բացի էլեկտրաէներգիայի խնդրից, ուրիշ ի՞նչ հարցեր եք բարձրացնելու:
-Քանի որ, ինչպես գիտեք, օգոստոսի 1-ին մենք անցկացրինք բողոքի երթ՝ «Լուսավորենք խավարը խորագրով, որտեղ ներկայացրինք մեր ութկետանոց պահանջները, և քանի որ դրանք այն պահանջներն են, որոնց կատարման համար ժամանակ էր հարկավոր, մենք կառավարությանը տվեցինք մեկ ամսից ավելի ժամանակ՝ մինչև սեպտեմբերի առաջին շաբաթը, որպեսզի լուծեն այս խնդիրները կամ գոնե ինչ-որ կերպ արձագանքեն, սակայն ոչ միայն անտարբերության մատնվեց, այլև առհասարակ արձագանք չեղավ: Ինձ թվում է՝ նրանք այն ժամանակվա ասածի նման են մտածում՝ «արկածախնդիր մի քանի երիտասարդ էին», երևի էլի մտածում են՝ հիմա էլ այս արկածախնդիր երիտասարդները նորից ոտքի են կանգնել, գոռգոռալով, մի քանի պահանջ դնելով՝ պիտի ինչ-որ բան փոխեն, առանց մտածելու, որ այս պահանաջները կկատարվեն:
Ճիշտ է, մենք չենք խոստացել, որ աշունը թեժ է լինելու, բայց մենք թեժացնելու ենք այդ աշունը, քանի որ բոլորս գիտենք, որ չի եղել օգոստոս ամսին մի դեպք, որ ամառվա շոգին 500-ից ավել անձինք քայլեն բավականին երկար ճանապարհ, առանց տրտնաջալու՝ իրենց բողքը բարձրաձայնեն, իսկ մեզ դա հաջողվեց անել: Ինչը մեզ հույս է տալիս: Գիտե՞ք, ժողովուրդը այդքան էլ անգիտակից չէ. մի մասը վախենում է, բայց վախը մի կողմ է դնում, երբ որ տեսնում է՝ փողոցում լիքը մարդ կա: Թեկուզ, աշխատելով չերևալ հենց առաջին գծում, ինքը կարող լինել հետին գծում ու ավելի շատ օգուտ տալ: Ինչ վերաբերում է ակցիաներին՝ բազում են լինելու: Լինելու են թե փոքր, թե մեծ մասշտաբների, թե ֆլեշմոբի տեսքով էլեկտրաէներգիայի հարցի վերաբերյալ: Բազում սոցիալական խնդիրներ կան, բայց սկզբում կփորձենք այդ հարցում արդյունք, հաջողություն ձեռք բերել և կանցնենք արդեն մնացած հարցերին:
Դիմելու ենք քաղաքացիական անհնազանդության բացառապես օրենքի շրջանակներում:
Հարցազրույցն ամբողջությամբ ՝ տեսանյութում։
