Նախագահ Միխաիլ Սաակաշվիլու մասնակցությամբ ստեղծված հանցավոր սխեման փորձել է սնանկացնել ներկայիս վարչապետ Բիձինա Իվանիշվիլուն պատկանող Քարթու-բանկը: Այս մասին երկուշաբթի օրը հայտարարել է Վրաստանի ՆԳ նախարարության պաշտոնական ներկայացուցչ Նինո Գիորգոբիանին, տեղեկացնում է ВЗГЛЯД հրատարակչությունը:
Նրա խոսքերով՝ այդ սխեմայի մեջ նախագահից բացի՝ մտել են խորհրդարանի, ֆինանսների նախարարության, արդարադատության և տնտեսական զարգացման նախարարությունների նախկին անդամներ:
Նա տեղեկացրել է, որ այդ ամենի նպատակը «ներկայիս վարչապետի հետ սնանկացման ճանապարհով հաշիվները մաքրելն է եղել»: Այս սխեման ստեղծվել է այն բանից հետո, երբ մեկ տարի առաջ Բիձինա Իվանիշվիլին սկսել է զբաղվել ընդդիմադիր քաղաքականությամբ:
Գիորգոբիանին նշել է, որ Վրաստանի նախկին իշխանություններին հավատարիմ բանկի կողմից վարկավորված գործարարներին թույլատրվել է պատասխանատվությունից խուսափել: Այդ վարկերի չափն անցնում է 60 միլիոն դոլարը:
Նրա խոսքերով՝ անցած տարվա նոյեմբեր ամսին արդարադատության նախկին նախարար Զուրաբ Ադեիշվիլին, ով այժմ գտնվում է փախուստի մեջ, այդ սխեմայի իրագործումը հանձնարարել է եկամուտների ծառայության նախկին ղեկավար Ջաբա Էբանոիձեին, ով էլ համապատասխան կարգադրություններն է արել իր աշխատակիցներին, ովքեր կապ են հաստատել գործարարների հետ:
Վերջիններս իրենց սնանկ են հայտարարել: Սակայն նրանց կարողությունները քողարկված ձևով հետագայում վերադարձվել են:
Էբանոիձեն և նրա ծառայության մի շարք աշխատակիցներ և տնտեսության նախկին փոխնախարար Դավիդ Գիորգաձեն համագործակցում են հետաքննության հետ:
Սաակաշվիլին դեռ մեկնաբանություններ չի արել, նա Ստրասբուրգում է:
