Շաբաթ օրը կայացած ՀՀԿ համագումարը ԱԺ պատգամավոր Նիկոլ Փաշինյանին հիշեցնում է բրեժնևյան ժամանակները, որը բարկեցություն ապահովեց քաղաքացուն, բայց սկսվեց անկումը: «Բայց խոսքն այս մասին չէ. ինչքան ծանր է այսօր, որ մարդիկ կարոտով հիշեցին բրեժնևյան ժամանակները: Եթե Սերժ Սարգսյանի ելույթը դիտենք որպես կենաց, ապա ցանկացած ծնունդի ժամանակ նման կենացներ հնչում են»,- «Երկիր Մեդիա» հեռուստաընկերության «Երկրի հարցը» հաղորդման եթերում ասել է Նիկոլ Փաշինյանը: Նրա խոսքերով՝ տնտեսական ինչ-ինչ ցուցանիշներ կարելի է ճգնաժամով պայմանավորել, բայց Հայաստանում արդարության պակասի ճգնաժամ է. «Ժողովրդավարության մասին իշխանության պատկերացումները դա են, որ իրենք էլ են խոսում, մենք էլ ենք խոսում: Ժողովրդավարությունը իշխանության համար «գյալաջի» անելու պրոցես է: Իշխանությունը պատկանում է ժողովրդին. եկեք դուրս գանք փողոց ու տեսնենք, թե ժողովուրդն իրեն զգո՞ւմ է երկրի տեր»:
Պատգամավորի խոսքերով՝ ընդդիմադիր քաղաքական ուժերի հասանելիության ոլորտում է՝ ծրագրել և իրականացնել այնպիսի սցենար, որը կբերի իրական փոփոխությունների. «Այնուամենայնիվ, իմ կարծիքն այն է, որ եթե ընդդիմադիր ուժերը մարդկանց համար ընկալելի ձևաչափով, մեխանիզմի հավաստիություն ապահովող ասելիքով ներկայանան նախագահական ընտրությունների, նույնիսկ այս վիճակում, երբ շատերը մտածում են, թե վերջնական է, ՀՀԿ-ն տոնում է իր հաղթանակը, ընկալելի փոփոխություններ կարելի է իրականացնել»:
Սերժ Սարգսյանի իշխանությունը, ըստ ՀԱԿ անդամի, Հայաստանի բոլոր ժամանակների վատագույն իշխանությունն է, որովհետև մնացածը, որքան էլ ձախողումներ ունեցել են, գոնե մի լավ բան կա: «Դրա համար էլ համագումարում ասում է կենաց. ժողովուրդ ջան, ողջ լինեք, եկեք էս էլ խմենք էսինչ բանի կենացը»,- ասել է Նիկոլ Փաշինյանը:
Խոսելով ընդդիմության միասնական թեկնածուի մասին՝ Նիկոլ Փաշինյանն ասել է, թե նա պետք է լինի մի մարդ, որը կարող է կոնսոլիդացնել դաշտը և առաջնորդի հատկանիշներ ունի: Փաշինյանը նշել է, որ խոսքը Լևոն Տեր-Պետրոսյանի մասին է. «Պետք է նրա շուրջը համախմբելի դարձնել և լինի կանխատեսելի գործողությունների ծրագիր»։
