Չինաստանի իշանությունները մտահոգ են Ճապոնիայի խորհրդարանի ստորին պալատի ընտրություններում հաղթանակ տարած Լիբերալ-դեմոկրատական կուսակցության քաղաքական մարտավարության առթիվ, սակայն բաց են տարածքային վեճի լուծման նպատակով երկխոսության համար, երկուշաբթի օրը հայտնել է ՉԺՀ-ի ԱԳՆ պաշտոնական ներկայացուցիչ Հուա Չունյինը:
«Մենք չափազանց անհանգստացած ենք, Ճապոնիայի ընտրած ուղղությամբ: Չինաստանը պատրաստ է աշխատել Ճապոնիայի հետ հօգուտ կայուն հարաբերությունների հետագա զարգացման: Մեր առաջադրանքն այսօր տարածքային վեճը լուծելն է (Դյաոյույդաո կղզիների շուրջ)»,- ասել է Չունյինը, փոխանցում է Interfax-ը:
ВЗГЛЯД թերթի հաղորդմամբ` ավելի վաղ Ճապոնիայի ապագա վարչապետ Սինձո Աբեն հայտարարել էր, որ իր երկիրը մտադիր չէ նահանջել այն տարածքներից, որոնք պատմականորեն իրենց են պատկանում: Նա պնդում է Սենկակու (չին. Դյաոյույդաո), կղզիների նկատմամբ Ճապոնիայի սուվերենության հարցում: Ամեն դեպքում, Աբեն նաև Չինաստանի հետ համագործակցելու պատրաստակամություն է հայտնել:
Նրա խոսքով` Տոկիոն ու Պեկինը «պետք է հասկանան, որ լավ հարաբերությունները ծառայում են երկու երկրների շահերին»:
«Չինաստանին մի փոքր չի հերիքում այդ հասկացությունը: Ուզում եմ, որ նրանք այլ կերպ նայեն փոխշահավետ ռազմավարական հարաբերություններին»,- նշել է նա:
Նախնական տվյալներով` կիրակի օրը տեղի ունեցած ընտրությունների արդյունքում Լիբերալ-դեմոկրատական կուսակցությունը ստացել է Ճապոնիայի խորհրդարանի ստորին պալատի 480 տեղից 294-ը:
«Կոմեյտոն» ստացել է 31 տեղ: Երկու կուսակցությունների ներկայացուցիչները հայտնել են, որ ծրագրում են կոալիցիոն կառավարություն ստեղծել:
Խորհրդարանում պատգամավորների թվով երրորդը դարձել է 2 ամիս առաջ ձևավորված «Ճապոնիայի վերականգնման ասոցացիան»` 54 մանդատ:
