Երեկ մենք հաղորդել էինք, որ երկու օր առաջ ՀՀ ոստիկանության քրեական հետախուզության գլխավոր վարչության նախկին պետ, գեներալ մայոր Հովհաննես Թամամյանի գործով Հատուկ քննչական ծառայությունում ցուցմունք է տվել Երևանի ոստիկանապետ Ներսես Նազարյանը։
Այսօր մենք պարզեցինք, որ բացի Երևանի ոստիկանապետից` այս գործում որպես վկա ներգրավված է նաև ՀՀ ԱԺ Հանրապետական պատգամավոր Լևոն Սարգսյանը (Ալրաղացի Լյովիկը):
Ըստ մեր աղբյուրի, հենց Լևոն Սարգսյանի` անվտանգության խոստումով է Արաբկիրի նախկին թաղապետ Հովիկ Շահինյանի քրոջ որդին համաձայնել «հանձնվել» իրավապահներին, իսկ երբ գործով հանձնվելուց հետո գործի քննությունը նրա համար նախատեսել է ցմահ ազատազրկում, Լևոն Սարգսյանը այլ դեպքերի նման հրաժարվել է միջամտել գործին, որից հետո միայն` գործի մասին Սերժ Սարգսյանի տեղեկանալուց հետո, գործը այլ ընթացք է ստացել։
Հիշեցնենք, ըստ մեր նախնական տվյալների, այս գործը, որի մեջ ներգրավված են ՀՀ ոստիկանության գործող այլ բարձրաստիճան պաշտոնյաներ կապված են Արաբկիրում կատարված մի սպանության գործի հետ, որը սխալ է քննվել և հանցանքը միտումնավոր բարդվել է անմեղ մարդու վրա` պատասխանատվությունից զերծ պահելով իրական հանցագործին: