Օրերս ավարտվել է «Գաբբնակշին»-ի ղեկավար Գագիկ Պապոյանի դեմ հարուցված քրեական գործի քննությունը. «Ինչպես սպասում ենք, իսկական մեղավորները մնացին կուլիսների հետևում, և քավության նոխազ դարձրին շինարար Գագիկ Պապոյանին` քննությունը վերածելով ծաղրուծանակի»,- այսօր լրագրողների հետ հանդիպմանը նշեցին Բուզանդի, Եկմալյանի, Արամի փողոցների նախկին բնակիչներ Վահան Սարուխանյանը, Սոնիկ Մաղաքյանը, Ռոբերտ Կարապետյանը և Սուրեն Աբրահամյանը, ովքեր Արամի 72-80 շենքերում բնակարաններ ունեն, սակայն պարզվել է, որ նորակառույցներում մի բնակարանը մի քանի անգամ վաճառված է, և առ այսօր չեն կարողանում ստանալ իրենց բնակարանները:
Սոնիկ Մաղաքյանի խոսքով՝ Գագիկ Պապոյանն ընդամենը շինարար էր, որը մտել է մի խաղի մեջ, որի կանոններին ծանոթ չէր, այդ պատճառով նրան օգտագործել են թալանի համար:
«Առանց շինթույլտվության վեր են խոյացել բարձրահարկ շենքեր, շենքը կառուցելուց հետո շենքերի վրա կատարվել է ռեկետ, շենքերը գրպանվել են անհատների կողմից, որոնք որևէ լումա չեն ներդրել շենքի կառուցման համար, սակայն 50 բնակարան ունեցող շենքերի են տիրացել: Արդյունքում հիսուն հայ ընտանիք դրսում է մնում, որ ինչ-որ մեկը գերշահույթ ստանա»,- ասաց Սոնիկ Մաղաքյանը:
Արամի 72-80 հասցեում բնակարան ունի Ռոբերտ Կարապետյանը, ում մինչ օրս չեն թողնում իր տուն մտնել: Նրա խոսքով՝ Գագիկ Պապոյանի դեմ իրենք ոչինչ չունեն, նա պայմանագրի համաձայն` կառուցել է շենքը, հիմա պետք է հանձնեն, որ իրենք կարողանան ներքին հարդարանք իրականացնել: Ի դեպ, Ռոբերտ Կարապետյանը այդ բնակարանը պետք է ստացած լիներ 2007-ի հունվարին, սակայն նոր սեփականատերեր են հայտնվել, շենքը պատրաստ է, բայց բնակիչներին չեն թողնում մտնել իրենց բնակարաններ:
2004-05թթ. կառուցվել է շենքը, սակայն 2007-88թթ. Երվանդ Զախարյանը կառուցված շենքի տակի հողը նվիրաբերել է Անդրանիկ Խալոյանին, որը շենքի կառուցումից յոթ-ութ տարի հետո հիշել է, որ նվիրաբերած հող ունի այնտեղ, և որոշել է, որ ինքը 50 բնակարան ունեցող շենքի տեր է:
Այլ կերպ, քան ռեկետ, սա չի կարող կոչվել` ասում է Սոնիկ Մաղաքյանը:
«Անդրանիկ Խալոյանը Երևանի ավագանու ԲՀԿ-ական անդամ է, հիմա ասում է, որ շենքը իրենն է, բայց իրեն ինչպե՞ս են հողակտոր տվել, երբ շենքի երկու հարկն այդ ժամանակ պատրաստ է եղել»,- հավելեց Սոնիկ Մաղաքյանը՝ հավելելով, որ կադաստրը, իր էությանը համապատասխան, սեփականաշնորհման գրքույկներ է վաճառել:
Եկմալյան փողոցի բնակիչ Վահան Սարուխանյանի տունը քանդել են 2006-ին՝ 25 ամիս հետո իրեն տնով ապահովելու պայմանով, սակայն մինչև այսօր որևէ շարժ չկա, թեև տան վրա արդեն աշխատանքներ է կատարել, մնացել է մանրահատակը, մինչդեռ այսօր նրան ասում են, թե ինքը բնակարան չունի այդտեղ:
Նա պատմեց, որ նոյեմբերի 2-ին հանդիպել է նախագահին, ներկայացրել է նրան խնդիրը, և նա խոստացել է մեկ ամսվա ընթացքում հարցը լուծել, սակայն մեկ ամիս անց էլ խնդիրը չի լուծվել: Մինչ Սերժ Սարգսյանի հետ հանդիպումը` Տարոն Մարգարյանը և ԾԻԳ-ի պետը նրան խոստացել են մինչև 2006 թվականը, երբ նոր շենքը կառուցվի, նրան նոր տուն հատկացնել: Նա վերջին հույսը կապում է Սերժ Սարգսյանի հետ:
Այժմ բնակիչները հույս են փայփայում, որ նախագահական ընտրություններից առաջ այս հարցը ի վերջո լուծում կստանա, սակայն այնքան էլ համոզված չեն, քանի որ հենց նախագահական վերահսկողությունից հույսեր էին տալիս խորհրդարանական ընտրություններից առաջ հարցը լուծել:
