Ղազախստանն ու ԵՄ-ն դուրս են գալիս Ընդլայնված գործընկերության մասին նոր համաձայնագրի շուրջ բանակցությունների եզրափակիչ փուլ: Այս մասին հայտնում է Ղազախստանի ԱԳՆ մամլո ծառայությունը: Սեպտեմբերի 8-ին հանրապետության արտգործնախարար Էրլան Իդրիսովը հանդիպել է Ղազախստանում հավատարմագրված եվրոպական երկրների դիվանագիտական առաքելությունների ղեկավարների հետ, որի ընթացքում քննարկել են Ղազախստան-ԵՄ ընդլայնված գործընկերության մասին նոր համաձայնագրի շուրջ բանակցությունները:
Հանդիպումը կայացել է համաձայնագրի եզրափակիչ՝ 8-րդ փուլի նախօրեին: Իդրիսովը նշել է, որ նոր համաձայնագիրը կկրի համապարփակ բնույթ, կարտացոլի առկա հասուն և իրավահավասար գործընկերությունը Ղազախստանի և ԵՄ-ի միջև՝ հիմնված ոչ միայն համատեղ շահերի, այլև համատեղ արժեքների, փոխըմբռնման, փոխադարձ հարգանքի վրա: Նրա խոսքով՝ այն պետք է դառնա կայուն հիմք՝ համագործակցությունն ավելի բարձր մակարդակի հասցնելու համար:
Համաձայնագրի նախաստորագրումը ծրագրված է 2014-ի աշնանը:
Նոր համաձայնագրի առանցքային տարրը արդիականացված առևտրա-ներդրումային բաժինն է, որը հաշվի է առնում Առևտրի համաշխարհային կազմակերպությանը Ղազախստանի միանալու հեռանկարը, ինչպես նաև ՄՄ-ի, Միասնական տնտեսական տարածքի և Եվրասիական տնտեսական միության զարգացումը:
