Կորեայի Հանրապետությունը Ալյասկայի էքստրեմալ ցրտերի պայմաններում կփորձարկի իր առաջին «Սուրիոն» ռազմական ուղղաթիռը։ Ռազմական թռչող, ծանր մեքենան փորձարկման վայր տեղափոխելու համար՝ կօգտագործվի ռուսական բեռնատար ինքնաթիռ։
Հաղորդվում է, որ «Սուրիոն»-ի փորձարկումները կտևեն դեկտեմբերի 24-ից մինչև հաջորդ տարվա փետրվարը։ Փորձարկման աշխատանքներին կմասնակցեն 20 մարդ։ Նրանց կազմում կլինեն ռազմական գերատեսչության ներկայացուցիչներ, ռազմական գիտահետազոտական գործակալության աշխատակիցներ և Կորեկան աերոտիեզերական կորպորացիայի ներկայացուցիչներ։
«Սուրիոն» ռազմական ուղղաթիռի ստեղծման աշխատանքները սկսվել են 2006-ից։ 2010-ին կայացել է առաջին ցուցադրական թռիչքը։ Նախատեսվում է 2017-2025 թթ ընթացքում կորեական բանակի ծովային հետևակազորի համար թողարկել 30 հատ այդ մեքենայից։ Ուղղաթիռը կօգտագործվի նաև քաղաքացիական նպատակների համար։
«Սուրիոնի» երկարությունը 15 մ է, բարձրությունը 4,5 մ, լայնությունը 2 մ։ Վրան տեղադրված է ամերիկյան Т-500 գազատուրբինային շարժիչ։ Հագեցված է նորագույն GPS համակարգով և իներցիիալ նավիգացիոն համակարգով, բեռնատարողությունը մինչև 8,7 տ է։
Հարավային Կորեան դարձել է սեփական արտադրության ուղղաթիռ թողարկող 11-րդ երկիրը։
