Հոգեբան Կարինե Նալչաջյանի կարծիքով, այսօր հայ հասարակության մեջ սկսվել է առաջնորդների որոնման պրոցես, քանզի նրանք, ովքեր հիասթափվել են թե իշխանությունից և թե ընդդիմությունից, առաջնորդների կարիք ունեն. «Չի բացառվում, որ մեր աչքի առաջ, մանավանդ ընտրություններին ընդառաջ, նոր առաջնորդների առաջ գալու, նոր խմբավորումների ձևավորման պրոցեսների մենք ականատես կլինենք»:
Ազգագրագետ Հրանուշ Խառատյանի դիտարկմամբ էլ, այսօր մեր հասարակությունը քաղաքական առաջնորդների նկատմամբ ավելի պրագմատիկ է դարձել. «Այս իմաստով հասարակության մոտեցումներով ներկայիս քաղաքական դաշտում առաջնորդներ են և՛ Սերժ Սարգսյանը, և՛ Լևոն Տեր-Պետրոսյանը, և՛ Ռոբերտ Քոչարյանը, և՛ Րաֆֆի Հովհաննիսյանը: Նրանց բոլորին ես տեսնում եմ որպես առանձին սեգմենտների համար առաջնորդների»:
Նալչաջյանը ևս համաձայն էր Խառատյանի թվարկած առաջնորդների անունների հետ, սակայն նշեց, որ այս պահին հայաստանյան քաղաքական դաշտում շատ ակնհայտ խարիզմատիկ առաջնորդ չկա:
