Հայաստանը Ռուսաստանից փախչելու տեղ չունի: «Առաջին լրատվական»-ի հետ զրույցում նման տեսակետ հատնեց Carnegie Endowment-ի մոսկովյան գրասենյակի փորձագետ Ալեքսեյ Մալաշենկոն՝ անդրադառնալով օրերս Ուելսում կայացած Ալիև-Սարգսյան հանդիպմանը:
Նա նշեց, որ Միացյալ Նահանգների ջանքերի ակտիվացումը ԼՂ հակամարտության կարգավորման հարցում Սոչիում կայացած եռանախագահների հանդիպման հետևանքն էր:
«Սոչիի եռանկյունու նպատակը հակամարտության կարգավորմանը շարժում հաղորդելն էր, բայց ամենակարևորը ցույց տալն էր, որ չնայած Ուկրաինայում ճգնաժամին, չնայած ՌԴ-ի դեմ պատժամիջոցներին և չնայած միջազգային հանրության կողմից մերժված լինելու հանգամանքին, Ռուսաստանը դեռ ունակ է նման սուր իրավիճակում միջնորդ դառնալ:
Ի՞նչ է անում ԱՄՆ-ը՝ անհապաղ արձագանքում է, և դա, այսպես ասած, ակնարկ է, թե ռուսական միջնորդությունն ամենակարևորը չէ, կան այլ տարբերակներ ևս, տեղին չէ հույսը դնել միայն Ռուսաստանի վրա, քանի որ կա Եվրոպա և ԱՄՆ: Վերջին հանդիպումը դա ցույց տվեց:
ԼՂ-ի շուրջ հակամարտությունն այն հակամարտությունն է, որը մշտական է. չկա որևէ դրական որոշում, որը ձեռնտու լիներ երկու կողմերին էլ: Կան ավելի շատ խոսակցություններ, ակնարկներ:
Եկեք սթափ դատենք. կա գործընթաց, և դա շատ ավելի կարևոր է, քան այն բախումները, որոնք տեղի ունեցան վերջերս: Այս բախումները լինելու են՝ չես փախչի, եթե կա նման հակամարտություն, բայց երևում է, որ այն ուժերը, որոնք ԼՂ-ի շուրջ գործում են` Ռուսաստանը, Եվրոպան, Ամերիկան, հիմնականում փորձում են գտնել լուծումներ, չսրել իրավիճակը»,- նշեց Մալաշենկոն՝ հավելելով, թե չի կարծում, որ պատերազմական գործողությունները կվերսկսվեն, քանի որ այդ պատերազմում հաղթող չի լինելու:
Անդրադառնալով ԵՏՄ-ին Հայաստանի անդամակցությանը` վերլուծաբանն ասաց, որ ինչ էլ լինի, Հայաստանը Ռուսաստանից փախչելու տեղ չունի:
Առաջարկում ենք մանրամասներին ծանոթանալ տեսանյութի միջոցով:
