Եգիպտոսում շաբաթ օրն անցկացված հանրաքվեի առաջին փուլին մասնակցած ընտրողների 2/3-ը դեմ է քվեարկել երկրի Հիմնական օրենքի նախագծին: Այս մասին ընտրատեղամասերի փակվելուց անմիջապես հետո հայտարարել են ընդդիմադիր «Ազգային փրկության ճակատի» ներկայացուցիչները՝ փոխանցում է ITAR-TASS-ը:
Իրենց կողմից հատուկ հրավիրված մամլո ասուլիսի ժամանակ հայտարարվել է, որ քվեարկությանը մասնակցած եգիպտացիների ավելի քան 66 տոկոսը «ոչ» է ասել իսլամիստների պատրաստած Սահմանադրության նախագծին:
Ընդդիմության կազմում գտնվող երկրի հնագույն լիբերալ ազգայնական «Ալ-Վաֆդ» կուսակցության ղեկավար Աս Սեյիդա Ալ-Բադաուիի խոսքով՝ «երբ չկա անվտանգություն, երբ ոստիկանությունը հեռանում է, կարելի է ասել, որ պետությունը ձախողվել է»:
Դեռ հանրաքվեի պաշտոնական ավարտից 1.5 ժամ առաջ «Մուսուլման եղբայրներ»-ի ներկայացուցիչները հայտարարել էին իրենց հաղթանակի մասին: «Մուսուլման եղբայրներ»-ի տվյալներով՝ ընտրողների 89 տոկոսը աջակցություն է հայտնել Սահմանադրության նախագծին և միայն 11 տոկոսն է դեմ եղել:
