Արագածոտնի մարզի ընդհանուր իրավասության դատարանում Սուրեն Մնոյանի նախագահությամբ ավարտվել է Նարեկ Պեպանյանի գործի դատական քննությունը:
1986 թվականին ծնված Նարեկ Պեպանյանը 2004 թվականից սկսել է դատապարտվել: Նախ 5 տարի ազատազրկման է դատապարտվել ավազակային հարձակման համար, ազատվել է պայմանական-վաղաժամկետ, 2007 թվականին սեռական ոտնձգության փորձի համար դատապարտվել է 5 տարի ազատազրկման, ազատվել է 2011 թվականի հունվարին, իսկ մի քանի ամիս անց՝ 2011 թվականի հուլիսին դատապարտվել է դիտավորությամբ ծանր մարմնական վնասվածք պատճառելու համար:
Պատիժը կրել է «Կոշ» ՔԿՀ-ում, և, լինելով դատապարտյալ, կալանավայրից կատարել է շորթում, որի համար Արագածոտնի մարզի ընդհանուր իրավասության դատարանը նրան մեղավոր է ճանաչել ՀՀ քրեական օրենսգրքի 182 հոդվածի 2-րդ մասի 3.1կետով:
Ըստ դատական ակտի՝ Նարեկ Պեպանյանը կալանավայրից բջջային հեռախոսով ինտիմ հեռախոսազրույցներ է ունեցել Նինա Ղ.-ի հետ (անունը փոխված է): Ապա «Օդնոկլասնիկի» կայքում ստեղծել է այդ կնոջ անունով անձնական էջ, այնտեղ տեղադրել կնոջ բջջային հեռախոսի համարը, լուսանկարները, պոռնկագրական բնույթի այլ լուսանկարներ ու վիրավորական մեկնաբանություններ:
Պեպանյանը պարբերաբար զանգահարել է Նինային, իրենց ունեցած ինտիմ հեռախոսազրույցների ձայնագրությունները հրապարակելու սպառնալիքով պահանջել է 3 հազար դոլար:
Ընդհանուր իրավասության դատարանում Նարեկ Պեպանյանն իրեն մեղավոր է ճանաչել մասնակիորեն:
Նա հայտնել է, թե «Կոշ» ՔԿՀ-ում ունեցել է բջջային հեռախոսներ՝ տարբեր քարտերով: «Օդնոկլասնիկի» կայքում ստեղծել է ուրիշի անվամբ և ուրիշի լուսանկարով էջ, շփվել է սկզբում իր բարեկամների ու ծանոթների, հետո՝ կայքում գրանցված կանանց ու աղջիկների հետ:
Այդպես ծանոթացել է Նինայի հետ, նրան ներկայացել է «Հենդո» անունով: Փոխանակել են իրենց հեռախոսահամարները: Ինքը թաքցրել է, որ դատապարտյալ է: Նինան պատմել է իր անձնական կյանքից, դժգոհել է ամուսնուց:
Ինքը Նինայի հետ ինտիմ բնույթի հեռախոսազրույցներ է ունեցել, դրանց մի մասը ձայնագրել է:
Ավելի ուշ Նինայից պարտքով գումար է խնդրել, բայց նա հրաժարվել է գումար տալ: Ինքը զայրացել է նրա վրա, սպառնացել է, թե կհրապարակի իրենց խոսակցությունների ձայնագրությունները: Նաև «Օդնոկլասնիկի» կայքում կնոջ անունով էջ է բացել, նրա հեռախոսի համարն է դրել, լուսանկարները, պոռնկագրական բնույթի այլ լուսանկարներ ու մեկնաբանություններ և սպառնացել է, որ այդ էջը կտարածի նրա ծանոթների ու բարեկամների շրջանում:
Նինայից պահանջել է հազար դոլար: Կինը համաձայնել է տալ այդ գումարը, ինքն էլ խոստացել է ջնջել նրա անվամբ էջը, ոչնչացնել ձայնագրությունները:
Նինային առաջարկել է գումարն ուղարկել Յունիբանկի միջոցով իր ծանոթուհու անվամբ: Ծանոթուհու անձնագրի տվյալներն ուղարկել է Նինային: Բայց պարզվել է, որ Նինան հաղորդում է տվել ոստիկանությունում:
Նարեկ Պեպանյանը պնդել է, որ Նինայից պահանջել է ոչ թե 3 հազար, այլ ընդամենը հազար դոլար:
Տուժող Նինան ամուսնացած է, ամուսնու, դստեր և որդիների հետ է բնակվել:
Նա դատարանում հայտնել է, թե հաճախ է օգտվել «Օդնոկլասնիկի» կայքից: 2013 թվականի մարտից շփվել է Հենդո անունով ներկայացած տղամարդու հետ, ով ասել է, թե բնակվում է Իտալիայում և զբաղվում է ոսկերչությամբ:
Տուժողն ասել է, թե «Հենդոն» սոցիալական կայքում շփվել է նաև իր դստեր հետ:
Տուժողը չի հասկացել, թե որ պահից է սկսել «Հենդոյի» հետ խոսել ինտիմ թեմաներով: Մի օր էլ «Հենդոն» զանգել ու տեղեկացրել է, որ իրենց ինտիմ զրույցները ձայնագրել է: Նա իրենից երկու հազար դոլար է ուզել պարտքով: Ինքն ասել է, թե չի կարող նման գումար տալ, խնդրել է իրեն չանհանգստացնել: Իրենք վիճել են: Շուրջ չորս ամիս չեն շփվել:
2013 թվականի սեպտեմբերին «Հենդոն» զանգահարել է ամուսնուն, խնդրել է հեռախոսը փոխանցել իրեն: Ամուսինը մտածել է, թե բարեկամ է զանգում, հեռախոսը փոխանցել է, բայց ինքը հասկացել է՝ ով է, ու անջատել է:
Երկու օր անց «Հենդոն» զանգել է, ասել, թե Իտալիայից եկել է Երևան, ինչ-որ պատմության մեջ է ընկել, շտապ 3 հազար դոլար է պետք: Ինքն ասել է, որ գումար տալ չի կարող:
«Հենդոն» սկսել է սպառնալ՝ եթե գումարը չտա, իրենց խոսակցությունների ձայնագրությունները կուղարկի ամուսնուն ու որդիներին:
Հետո ինքն իմացել է, որ կայքում նա իր անունով էջ է ստեղծել, սպառնացել է այն տարածել բարեկամների շրջանում: Ինքը սկսել է սակարկել, ժամանակ է խնդրել, որ գումար ճարի: Միաժամանակ իրենց խոսակցությունները ձայնագրել է, տեղի ունեցածը պատմել է ամուսնուն և հաղորդում է ներկայացրել ոստիկանություն:
2013 թվականի հոկտեմբերի 14-ին «Հենդոն» զանգել է, ինքն ասել է, թե միայն 1000 դոլար է ճարել: Նա բացատրել է, թե ում անունով փոխանցի այդ գումարը:
Ոստիկանության աշխատակիցների հետ համագործակցելով՝ հազար դոլարի փոխարեն նշված անձի անունով փոխանցել է 400 դրամ: Հետո իմացել է, որ նույն օրը Գյումրիում գումարը ստանալու պահին ոստիկանները բռնել են մի կնոջ: Դրանից հետո է պարզվել, որ «Հենդոն» կալանավայրում պատիժ կրող Նարեկ Պեպանյանն է:
Տուժող Նինայի դուստրը հայտնել է, որ «Հենդոն» սոցիալական կայքում իր հետ փորձել է ինտիմ թեմաներով խոսել, ինքը նրան գցել է «սև ցուցակ: Իմացել է, որ այդ անձը զանգել է իր հայրիկին, ասել, որ մայրը նրա սիրուհին է: Հայրը բարկանալով՝ ժամադրել է նրան, հայրն ու եղբայրը գնացել են նրա հետ հանդիպման, բայց նա չի եկել:
Այս գործի քննության ընթացքում ի հայտ են եկել բազմաթիվ կանայք ու աղջիկներ, ովքեր «Օդնոկլասնիկի» կայքով ու հեռախոսազրույցներով շփվել էին«Հենդոյի» հետ, ոմանք նրան մանր գումարներ էին ուղարկել, որ իր կարիքները հոգա:
Ընդհանուր իրավասության դատարանը Նարեկ Պեպանյանին մեղավոր է ճանաչել շորթում կատարելու համար, վերջին հաշվով դատապարտել է 5 տարի 6 ամիս ազատազրկման: Պատժի սկիզբը՝ 2014 թվականի հուլիսի 29-ից:
Դատավճիռը չի բողոքարկվել և օրինական ուժի մեջ է մտել սեպտեմբերի 1-ից: