Էլեկտրակապի միջազգային միության համաշխարհային կոնֆերանսին (ԷՄՄՀԿ) ԱՄՆ-ը հրաժարվել է ստորագրել համացանցի կանոնավորման հարցում կառավարությունների իրավասությունները մեծացնող փաստաթուղթը: Reuters գործակալության փոխանցմամբ` ԱՄՆ-ի որոշմանն աջակցել են` Կանադան, Դանիան, Ավստրալիան, Նորվեգիան, Կոստա Ռիկան, Սերբիան, Հունաստանը, Ֆինլանդիան, Մեծ Բրիտանիան և այլ երկրներ, հայտնում է hitech.vesti.ru-ն:
Առանձին երկրների` ցանցի վերահսկողության ուժեղացման նախաձեռնությունը ԷՄՄՀԿ-ի քննարկմանն է ներկայացրել 6 երկրներից կազմված բլոկը, որի կազմի մեջ են մտնում Ռուսաստանը, Չինաստանը, Սաուդյան Արաբիան, Ալժիրը, Բահրեյնը, Սուդանը և ԱՄԷ-ն: Փաստաթղթում, մասնավորապես նախատեսվում է IP-հասցեներն ինքնուրույն սեփականացնելու և վերացնելու կառավարությունների իրավունքը (ներկայումս դրանով զբաղվում են ոչ կոմերցիոն կազմակերպությունները, ինչպիսին ICANN-ն է):
ԷՄՄՀԿ-ն բացվել է դեկտեմբերի 3-ին Դուբայում: Կոնֆերանսը կավարտվի դեկտեմբերի 14-ին: Կազմակերպիչը Էլեկտրակապի միջազգային միությունն (ԷՄՄ) է, որը 1947թ.-ից ՄԱԿ-ի կազմում է:
Փորձագետները ԷՄՄՀԿ-ին քննադատում են այն բանի համար, որ մեկ երկիրը միայն մեկ ձայն ունի, իսկ դրա բնակչության թիվը հաշվի չի առնվում: Խոշոր ինտերնետ-ընկերությունները, օրինակ` Google-ը, բողոքում են, որ իրենք կարող են մասնակցել քննարկումներին, բայց ձայնի իրավունք չունեն:
Միջկառավարական քննարկումների գլխավոր թեման համացանցի պետական կարգավորումն է:
