Մեծ Բրիտանիայում վերսկսված հորդառատ անձրևները ստիպել են Շրջակա միջավայրի հարցերով գործակալությանը 14 նախազգուշացում արձակել ջրհեղեղի սպառնալիքի մասին, գլխավորապես երկրի հարավ-արևմուտքում: Այս մասին գրում է RIA Novosti-ն:
Գործակալություննն այսօր տեղեկություն է տարածել Անգլիայի, Շոտլանդիայի և Ուելսի 69 շրջաններում ջրհեղեղի սպառնալիքի մասին: Այդ շրջանների մեծ մասը դեռևս ոտքի չեն կանգնել անցած ամսվա ջրհեղեղներից: Մեծ Բրիտանիայի օդերևութաբանական բյուրոն նույնպես կանխատեսում է, որ երկրի տարածքի մեծ մասում ջերմաստիճանի բարձրացումը առաջիկա օրերին կհանգեցնի ուժեղ անձրևների:
Ներկայում ամենից շատ տուժել են հարավարևմտյան Դևոն և Քորնուոլ կոմսությունները, որոնց տարածքի մեծ մասում երկաթուղային հաղորդակցությունը խաթարված է: Մարդկանց խորհուրդ է տրվում առափնյա գոտիներ չգնալ: Քամու ուժգնությունը ներկայում հասնում է 35մ/վ-ի:
Օդերևութաբանների կանխատեսումներով՝ առաջիկա օրերին այդ շրջաններում տեղումների քանակը կկազմի 30 մմ:
