Ռուսաստանի ԱԳՆ-ն Սևծովյան տնտեսության համագործակցության (ՍՏՀ) երկրներին կոչ է անում շաբաթ օրը Ստամբուլում կայանալիք կազմակերպության նիստի ժամանակ հրաժարվել քաղաքական հարցեր քննարկելուց: Այս մասին հաղորդում է RIA Novosti-ն՝ վկայակոչելով ՌԴ ԱԳՆ հայտարարությունը:
ՌԴ ԱԳՆ հայտարարության մեջ նշվում է, որ անհրաժեշտ է մասնակից երկրների ջանքերը կենտրոնացնել հստակ ծրագրերի իրականացման վրա և լիովին հրաժարվել քաղաքականցված հարցերից:
Թուրքիայի Ստամբուլ քաղաքում նիստը կայանալու է ՍՏՀ արտգործնախարարների տեղակալների մակարդակով: Ռուսաստանն առաջարկում է հանդիպման շրջանակներում քննարկել բացառապես սոցիալ-տնտեսական խնդիրներ, ինչպես օրինակ՝ զբոսաշրջության ոլորտում համատեղ ուժերի կենտրոնացում, էլեկտարաէներգետիկ օղակի ստեղծում, պայքար հանցագործության և ահաբեկչության դեմ, շրջակա միջավայրի պահպանություն և այլն:
Սևծովյան տնտեսության համագործակցությունը ստեղծվել է 1992 թ. Թուրքիայի նախաձեռնությամբ՝ Սև ծովի ջրավազանին հարող երկրների միջև համագործակցություն հաստատելու նպատակով: ՍՏՀ-ն միավորում է Սև ծովի և Բալկանյան թերակղզու տարածաշրջանի 12 պետություն՝ Հայաստան, Վրաստան, Ադրբեջան, Թուրքիա, Ալբանիա, Հունաստան, Բուլղարիա, Մոլդովա, Ռուսաստան, Ռումինիա, Սերբիա և Ուկրաինա: Կազմակերպության շտաբ-գրասենյակը գտնվում է Ստամբուլում: