«Սամանամերձ գյուղերը դատարկվում են իշխանությունների կողմից վարվող քաղաքականության պատճառով, ոչ մի առանձնահատուկ վերաբերմունք չկա, աշխատատեղ չկա»,- ահազանգում են «Աջակացենք սահմանամերձ բնակավայրերին» քաղաքացիական նախաձեռնության անդամները:
«Կառավարությունը խնդիրների նկատմամբ մանկական մոտեցում ունի: Մենք տեղյակ չէինք, հիմնականում այդպես են ասում, հիմա տեղեկացնում ենք. սահմանամերձ գյուղերում աշակերտը վճարում է գրքի համար, գույք չկա, յոթանասունականներից մնացած գույք է ժառանգություն մնացել»,- ասաց նախաձեռնության անդամ Սոֆյա Հովսեփյանը՝ հավելելով, որ դիմել են ԿԳՆ գույքի խնդրով, բայց ասել են, որ Երևանի ավագ դպրոցները պետք է կահավորվեն, եթե ավելացավ՝ նոր…
Բացի դրանից՝ Տավուշի մարզի սահմանամերձ գյուղերում ընդամենը մեկ հրշեջ մեքենա կա. Մովսեսում, այնինչ սահմանամերձ գյուղերում դպորցեներն ու մանկապարտեզներն անգամ ամեն պահ կրակահերթի տակ կարող են լինել, արտերը, դաշտերը ևս:
Նախաձեռնության անդամ Շողեր Բաբայանն էլ ասաց, որ սահմանամերձ գյուղերի դատարկման հիմնական պատճառը ոչ թե կրակոցներն են, այլ ֆինանսական խնդիրները: Այդ գյուղերում հիմնականում աշխատատեղերը դպրոցն ու մանկապարտեզն են, որտեղ ուսուցիչներին, դաստիարակներին ոչ մի արտոնություն չի տրվում, աշխատավարձը նույնն է:
Նախաձեռնության անդամներն ասացին, որ դիմում են նարկայացնելու կառավարություն վերոնշյալ խնդիրների առնչությամբ:
Սահմանամերձ գյուղերում հրատապ լուծում պահանջող խնդիրներից է նաև արգելապատնեշի հարցը և հակառակորդի այն դիրքերի չեզեքացումը, որոնցից կրակում են անմիջապես գյուղերի ուղղությամբ:
