Թուրքական Dünya Bülteni լրատվական կենտրոնի փոխանցմամբ՝ այն բանից հետո, ինչ «Քրդստանի աշխատավորական կուսակցության» (PKK) մարտիկները սեպտեմբերի կեսերին Բինգյոլում (Բյուրակն) հարձակվեցին զինվորականներին փոխադրող ավտոբուսի վրա և սպանեցին 10 զինծառայողի, Թուրքիայի զինված ուժերի գլխավոր շտաբը որոշեց, այսուհետ իր կողմից կանխորոշած վտանգավոր գոտիներում զորքերի տեղաշարժն իրականացնել ոչ թե ցամաքային, այլ՝ օդային ճանապարհով:
Թուրքիայի տրանսպորտի նախարար Բինալի Յըլդըրըմն այս կապակցությամբ հայտարարել է, որ ինքնաթիռներով զինծառայողների փոխադրման գործընթացը մեկնարկելու է տարեսկզբից: Յըլդըրըմի խոսքերով՝ օդային ճանապարհով տարեկան փոխադրվելու է 300,000 զինծառայող:
Նա մանրամասնել է, որ օդային ճանապարհով զինծառայողների փոխադրումն իրականացվելու է ոչ միայն «Թուրքական ավիաուղիներ» (THY) ընկերության ինքնաթիռներով, այլև մասնավոր ավիաընկերությունների միջոցով:
