ԱՄՆ ղեկավարությունը գրեթե իրական ժամանակում տեղեկություն է ստացել Հյուսիսային Կորեայի կողմից բալիստիկ հրթիռի արձակման նախապատրաստական աշխատանքների մասին, սակայն այդ տեղեկությունները չի տրամադրել Հարավային Կորեային՝ մտավախություն ունենալով, որ արտահոսքի պատճառով գաղտնի տեղեկությունը հասանելի կդառնա հյուսիսկորեական հատուկ ծաառայություններին: Այս մասին հայտնում է RIA Novosti-ն՝ հղում անելով ճապոնական «Սանկեյ» թերթը: Չի նշվում, թե ինչ արտահոսքի մասին է խոսքը:
Հյուսիսային Կորեան հրթիռը տիեզերք էր արձակել չորեքշաբթի՝ ժ. 09.49-ին։ 09.59-ին արբանյակը մուտք էր գործել ուղեծիր:
Ինչպես հաղորդում է «Սանկեյը»՝ հիմնվելով ԱՄՆ հետախուզական տվյալների վրա, Ճապոնիայի ղեկավարությունը ենթադրում էր, որ հյուսիսկորեական հրթիռի արձակումը կարող է իրականացվել դեկտեմբերի 12-ին կամ այդ թվին մոտ օրերին, ու ծրագրում էր նախազգուշացնել երկրի բնակչությանը հրթիռի հնարավոր արձակման մասին:
Ընդ որում՝ համապատասխան հայտարարությունը Ճապոնիայի բարձրագույն մարմինները պետք է կատարեին երեկ՝ առավոտյան ժ. 8.00-ին, իսկ մամուլի համար հայտարարություն պետք է արվեր ժ. 11.00-ին, սակայն Ճապոնիայի իշխանություները չհասցրին նախազգուշացնել բնակչությանը, քանի որ արդեն ժ. 9.50-ին Հյուսիսային Կորեան հրաման արձակեց բաց թողնել հրթիռը:
Փխենյանի գործողությունները սուր քննադատության են արժանացել միջազգային հանրության կողմից, ըստ որի՝ հրթիռի արձակումը ՄԱԿ-ի ԱԽ բանաձևի անմիջական խախտում է:
