Առանց անուններ նշելու թշնամիներին երգերում հիշատակելն ընդունված է շոու-բիզնեսի աշխարհում: Եթե հավատանք տաբլոիդներին, ապա այս մեթոդից օգտվել է նաև Մադոննան՝ միանգամից ասելիքը իր երկու թշնամիներին փոխանցելու նպատակով՝ Լեդի Գագային, որին ով չի ալարում, Մադոննայի հետ է համեմատում, ինչպես նաև իր նախկին ամուսնուն՝ Գայ Ռիչիին, գրում է Spletnik.ru-ն:
Խոսքը երկու երգերի մասին է, որոնք համացանց են ներթափանցել: Երկուսն էլ ձայնագրվել են երգչուհու հաջորդ ալբոմի համար:
Two Steps Behind Me երգը, դատելով ամեն ինչից, նվիրված է Գագային: Ահա թե ինչ է ասվում այդ երգում. «Դու կրկնօրինակում ես ինձ, իսկ որտեղ են իմ հեղինակային իրավունքի համար վճարները: Դու գեղեցիկ աղջիկ ես, չեմ վիճում, սակայն իմ բաղադրատոմսերը գողանալ գեղեցիկ չէ: Դու ինձ լա՞վ ես ուսումնասիրել: Սակայն ամեն դեպքում դու երբեք իմ տեղը չես գրավի, ինչ էլ որ անես: Կարող ես քայլել՝ ինչպես ես, խոսել ինձ պես, սակայն ամեն դեպքում ինձանից երկու քայլ հետ կլինես»:
Գայ Ռիչիին նվիրված Heartbreak City երգում երգչուհին ասում է. «Ասում էիր, որ ես քո թագուհին եմ, սակայն ազատություն ցանկացար: Դու ստացար այն, ինչ քեզ պետք էր՝ փառք և հարստություն, և ես քեզ այլևս պետք չէի: Դու առանց պատճառի ինձ պատառոտեցիր: Անիծում եմ այն օրը, երբ հանդիպեցի քեզ: Այդ հիշողությունները հետապնդում են ինձ, իսկ ես ուզում եմ մոռանալ ամեն ինչ»:
Այնքան էլ պարզ չէ, թե երկրորդ երգի հասցեատեր ինչո՞ւ են համարում Ռիչիին, և Մադոննան էլ չի շտապում հաստատել կամ հերքել դա:
Ընդ որում, հայտնի չէ նաև, թե վերը նշված երգերը նախատեսվա՞ծ են արդյոք լայն լսարանի համար, թե՞ ոչ: Նոր ալբոմի համար գրեթե 50 երգ է ձայնագրվել, սակայն դրանցից ոչ բոլորը կներառվեն երգացանկի մեջ:
Մադոննայի կարիերայում դա 13-րդ ալբոմը կդառնա, որի անունը առայժմ չի հրապարակվում:
