«Ուրիշ բան-ման կասենք, խայտառակ պատմություն կլինի». այսպիսի ձևակերպմամբ «Առաջին լրատվական»-ին դիմավորեցին Արարատի մարզի Մխչյան գյուղում:
Սկզբում գյուղում ընդհանրապես գյուղատնտեսական, սոցիալական խնդիրներից խոսել չէին ցանկանում. ասացին՝ վարչապետ Հովիկ Աբրահամյանն իրենց համագյուղացին է, անհարմար է, բայց համայնքի բնակիչները, միմյանց հերթ չտալով, խայտառակ խնդիրների շարքում առաջինը խոսեցին ոռոգման ջրի մասին. «Բոլոր առուները, անգամ մայր առուն ցամաքած է, գորտի կռոցներն էլ են վերացել էլ չեն կռում, կանալը ջուր կա՝ չեն տալիս, չգիտենք՝ ջուրը ուր ա գնում»: Գյուղացիները նշեցին՝ ջուր կարող է 10 օրով էլ չլինել, բացի այդ, վարձն այնքան թանկ է, որ շատերը հնարավորություն չունեն օգտվելու՝ հեկատարի համար 35 հազար դրամ:
Գյուղում թե կին, թե տղամարդ նկատում էին, որ այսպես շարունակվեց՝ համայնքի 95 տոկոսը հողի մշակությամբ չի զբաղվի, առանց այդ էլ դաշտերը մեծամասամբ անմշակ են, ջուր չկա, չորցած տարածություններ են: Հարկերը, վարկերը մի կողմից են խեղդում, մյուս կողմից էլ՝ եղանակային տհաճ անակնկալները: Գյուղացիների մեծամասնությունն ասաց, որ Հովիկ Աբրահամյանին ջրի խնդրով չեն դիմել։ «Կառավարությունում որ մեկը չգիտի, որ գյուղում ջուր չկա, բոլորն էլ գիտեն , մեզանից լավ գիտեն»,- հավելում էին Մխչյանի բնակիչները: Ըստ նրանց՝ Հովիկ Աբրհամյանը, չնայած հիմա Մոնումենտի իր առանձնատանն է ապրում, բայց գյուղ հաճախ է գալիս, սակայն գուցե այս խնդիրների մեջ չի ուզում մտնել, չի հետաքրքրվում:
Առավել մանրամասն՝ տեսանյութում։
