Սիրիայում Մարդու իրավունքների հնարավոր խախտումների հետաքննության ՄԱԿ-ին կից հանձնաժողովը պնդում է, որ Սիրիայի իշխանություններն ապրիլին քիմիական զենք են կիրառել երկրի արևմուտքում: Այս մասին հայտնում է ITAR-TASS-ը՝ հղում անելով հանձնաժողովի այսօր ներկայացրած հերթական զեկույցին:
Փաստաթղթում ասվում է, որ կառավարական ուժերը ապրիլի 11-29-ին գրոհել են քաղաքացիական անձանցով բնակեցված տարածքներ Իդլիբ և Համա մարզերում: Նկարագրվում է 8 այդպիսի դեպք:
«Վկաները տեսել են տակառային ռումբեր նետող ուղղաթիռներ, և դրանց պայթելուց անմիջապես հետո քլորի նման հոտ են զգացել»,- ասվում է փաստաթղթում: Հանձնաժողովի անդամները, հղում անելով ականատեսներին և բժիշկներին, պնդում են, որ այդ հարձակումից հետո մարդկանց շրջանւմ նկատվել են ախտանշաններ, որ լինում են քիմիական նյութերի կիրառումից հետո՝ սրտխառնոց, մաշկի գրգռվածություն, շնչառական խնդիրներ և շոկային վիճակ:
Հանձնաժովովը եզրակացրել է, թե «բավարար հիմքեր կան ենթադրելու, որ 10 օրվա ընթացքում քիմիական նյութեր են կիրառվել» 8 անգամ, նաև «որ դրանք տակառային ռումբերով նետվել են կառավարական ուղղաթիռներից»:
