Samsung ընկերությունը մշակում է բջջային ցանցերին միանալու հնարավորությամբ «խելացի» ժամացույցը: Նորույթը կարող են ցուցադրել արդեն հաջորդ չորեքշաբթի՝ սեպտեմբերի 3-ին, Unpacked 2014 մամլո կոնֆերանսի շրջանակներում: SamMobile կայքի տվյալներով՝ սարքավորման թվատախտակը կլոր կլինի, ինչպես թողարկման պատրաստվող Moto 360-ը և LG G Watch R-ը:
Սեպտեմբերին Բեռլինում կայանալիք IFA ցուցադրությանը Samsung-ը, ամենայն հավանականությամբ կցուցադրի սարքավորման վերջնական տարբերակը: Այն վաճառքի կհանվի այս տարի ավելի ուշ: Սակայն, մինչև այժմ պարզ չէ, թե որ պլատֆորմով կաշխատի ժամացույցը:
Հաջորդ շաբաթ ընկերությունը մի քանի այլ նորույթներ էլ կցուցադրի՝ չորրորդ սերնդի Galaxy Note պլանշետաֆոնը, ինչպես նաև վիրտուալ իրականության Gear VR սաղավարտը:
Unpacked 2014-ը ավանդաբար կանցկացվի IFA ցուցադրությունից առաջ: Samsung-ը իր արարողությունը պլանավորել է սեպտեմբերի 3-ին: Այն միաժամանակ կանցկացվի Բեռլինում, Պեկինում և Նյու Յորքում:
