Ի պատասխան Ադրբեջանում լրագրող և իրավապաշտպան Իլհար Նասիբովի վրա դաժան հարձակման, Freedom House-ը հանդես է եկել խիստ հայտարարությամբ՝ տեղեկացնում է contact.az-ը:
«Սարսափելի ֆիզիկական բռնությունը Իլհար Նասիբովի նկատմամբ վերջին հարվածն է Ադրբեջանում մարդու իրավունքների սրընթաց ու արմատապես վատթարացող իրավիճակին»,- հայտարարել է Freedom House-ի ղեկավար Դևիդ Կրամերը:
«Ակնհայտ է, որ Ադրբեջանի իշխանությունները վճռական են տրամադրված իրավապաշտպաններին ու իրենց բոլոր քննադատներին հետապնդելու առումով՝ կալանավորելու, կեղծ մեղադրանքներ առաջադրելու կամ դաժան ծեծի ենթարկելու միջոցով, ինչպես դա տեղի ունեցավ օգոստոսի 21-ին Նասիբովի հետ:
Նախագահ Իլհամ Ալիևը խորապես սխալվում է, եթե մտածում է, որ կարող է անտեսել իր կառավարության քննադատությունը առանց լուրջ հետևանքների, մինչ միջազգային հանրության ուշադրությունը կենտրոնացած է այլ շրջանների վրա:
Նա ու իր կառավարությունը պետք է պատասխանատվություն կրեն այդ վտանգավոր ու թշնամական մթնոլորտի համար, որն ստեղծում են»,- ընդգծել է Կրամերը:
«ԱՄՆ-ն ու Եվրամիությունը պետք է պատժամիջոցներ սահմանեն այն պաշտոնական անձանց դեմ, ովքեր պատասխանատու են ու իրականացնում են այդ սարսափելի գործողությունները»,- ընդգծել է Կրամերը:
