Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ պետք է շարունակվեր պետական գույքի յուրացման փորձի համար մեղադրվող 27-ամյա Կարեն Գրիգորյանի և 28-ամյա Մելիք Գևորգյանի գործի դատաքննությունը:
Ըստ մեղադրանքի՝ պաշտպանության նախարարության զորամասերից մեկի անձեռնմխելի պաշարների պահեստարանի պետ Գրիգորյանը և պահպանման բաժնի պետ Գևորգյանը, կատարելով սառնարանային տնտեսության պահեստարանի պետի պարտականությունները, հանդիսանալով նյութական պատասխանատու անձինք, իրենց վստահված պետական գույքից յուրացման եղանակով, Երևան քաղաքի բնակիչ, 39-ամյա Հովհաննես Մանուկյանի օժանդակությամբ, վերջինիս ավտոմեքենայով 2012 թվականի հուլիսի 14-ին փորձել են հափշտակել զգալի չափերի՝ 142 հազար 870 դրամ արժեքով ձեթ ու խոզի միս, սակայն իրենց կամքից անկախ հանգամանքներում հանցագործությունն ավարտին չեն հասցրել:
Ձեթն ու խոզի միսը վերադարձվել են ՊՆ համապատասխան զորամասին:
Պաշտպանական կողմի միջնորդությամբ այսօր դատարանում պետք է հարցաքննվեր տուժողի՝ ՊՆ-ի ներկայացուցիչը, որպեսզի պարզ լիներ տուժող կողմի դիրքորոշումը ամբաստանյալների կատարածի վերաբերյալ:
Սակայն տուժողի ներկայացուցիչ Նարինե Կարապետյանն այսօր դատարան ներկայանալու փոխարեն մի գրություն էր ուղարկել, համաձայն որի՝ պաշտպանության նախարարությունը քաղհայց չի ներկայացնում, քանի որ ձեթի ու խոզի մսի հափշտակությունն ամբաստանյալներն ավարտին չէին հասցրել, հիշյալ ապրանքները վերադարձվել էին զորամաս, նախարարությունը նյութական վնաս չէր կրել:
Միայն թե երեկ տուժողի ներկայացուցիչը դատարան էր հրավիրվել ամենևին էլ ոչ հայց ներկայացնել-չներկայացնելու հարցը ճշտելու համար: Ակնհայտ է, որ նյութական վնաս չկար, ուրեմն և քաղհայց չկար: Բայց տուժող կողմն իր դիրքորոշումը պիտի հայտներ բողոքի կապակցությամբ, որպեսզի մեղադրանքի պաշտպանության կողմն էլ հստակեցներ իր առաջիկա քայլերը:
Դատարանը որոշեց Նարինե Կարապետյանին մեկ անգամ ևս հրավիրել դատարան ու հաջորդ նիստին, այնուամենայնիվ, պարզել տուժող կողմի դիրքորոշումը:
Այս հանցանքն սկսվել, բայց չէր ավարտվել, մնացել էր որպես հանցափորձ: Հափշտակելիք գույքն էլ՝ ձեթն ու խոզի միսը, զգալի չափերի արժեք ունեին ու վերադարձվել էին զորամասի պահեստարան:
Ամբաստանյալի տեղում նստած երիտասարդ տղամարդիկ կարող են և չդատապարտվել, նրանց հանցափորձի արդյունքում տուժող կողմը որևէ վնաս չի կրել:
Միայն թե ցավալի է, որ ձեթն ու խոզի միսը ԶՈՐԱՄԱՍԻ պահեստարանից փորձել էին հափշտակել նյութական պատասխանատու մարդիկ, ովքեր ի պաշտոնե «անձեռնմխելի պաշարների պահեստարանի պետ, պահպանման բաժնի պետ, սառնարանային տնտեսության պահեստարանի պետի պարտականությունները կատարող» էին կարգված: Անձեռնմխելի՜ պաշարների պահեստարանի պետ, որը «ձեռնամխել էր» իր պահպանությանը հանձնված ու զինվորների համար նախատեսված ձեթին ու խոզի մսին: Եվ պահպանման բաժնի պետ, որը չէր պահպանել:
Գրիգորյանն ու Գևորգյանը մեծ պաշտոնների չէին, փոքրիկ պաշտոններ ունեին, հետն էլ նյութական պատասխանատու էին համարվում: Նրանց հափշտակելիքն էլ շատ մեծ բան չէր, կարծես: Ուղղակի փորձել էին «օգտվել» «իրենց մասշտաբով»: Զինվորական հագուստ էին կրում երկուսն էլ: Բայց զինվորական հագուստ կրողը և պատասխանատվություններ ստանձնած երեկվա զինվորը զինվորից ո՞նց է գողանում…
