«Հրապարակ» թերթը գրում է. «Ֆրանսիացիներն ասում են. «Մարդն է զարդարում պաշտոնը»: Զարդարելն էլ հնարավոր է, բայց որ մարդը կարող է անվանարկել պաշտոնը` ՀՀ վարչապետ Հովիկ Աբրահամյանը դրա մարմնացյալ ապացույցն է:
Ընդամենը մեկ շաբաթ առաջ Աբրահամյանը կատարելապես անվանարկեց ինքն իրեն (դա՝ մի կողմ), նաև Հայաստանի կառավարությանը և ընդհանրապես երկիրը, երբ հրաժարվեց ՀՀ եզդի ազգաբնակչության ներկայացուցիչներին ընդունել և Իրաքում ծավալված եզդիների կոտորածների վերաբերյալ նրանց մտահոգություններն ու պահանջները լսել: Դա մի այնպիսի սխալ էր և տապալում, որ իրադրությունը փրկելու համար պաշտոնապես արձակուրդում գտնվող Սերժ Սարգսյանն ստիպված եղավ միջամտել: Էլ ԱԳՆ-ին հանձնարարեց խնդիրը միջազգային ատյաններում բարձրացնել, էլ իր խոսնակի անունից (թե՞ խոսնակը Սարգսյանի անունից) եզդիների ցեղասպանությունը դատապարտող հայտարարություն տարածեցին, էլ ՀՀ կառավարության կողմից Իրաքի եզդիներին տրամադրվող մարդասիրական օգնության ծավալն ընդլայնեցին:
Միով բանիվ, Սարգսյանի միջամտությամբ, ըստ կարելվույն, Հովիկ Աբրահամյանի կատարյալ սայթաքումն ու ձախողումը փորձեցին կոծկել: Բայց դե… «Կարմիր կովը կաշին չի փոխում», կամ՝ «Կուզը գերեզմանում է ուղղվում»: Մեկ շաբաթ չանցած՝ Հովիկ Աբրահամյանը նոր արկած է մատուցում: Շուրջ հինգ ամիս ՀՀ վարչապետի աթոռն զբաղեցնող և գոնե հինգ օտարերկրյա պաշտոնակցի հանդիպել չկարողացող Աբրահամյանն այնպես է ոգևորվել Վրաստանի վարչապետի այցից, որ այսօր սկսվող Իրաքլի Ղարիբաշվիլու այցի մասին երեկ հաղորդագրություն է տարածել, որը դժվար է ասել, թե քանի տողով է համընկնում նույն այցի մասին Ղարիբաշվիլու գրասենյակի տարածած հաղորդագրության հետ:
Հոդվածն ամբողջությամբ՝ թերթի այսօրվա համարում
