Շուտով կթևակոխենք 2014 թվականի աշունը, սակայն արդարադատության նախարարության «Արմավիր» ՔԿՀ-ն այդպես էլ շահագործման չի հանձնվում:
Հիշեցնենք, որ շենքը պետք է շահագործման հանձնվեր դեռևս նախկին նախարար Հրայր Թովմասյանի օրոք՝ 2013 թվականին, ապա այդ ժամկետը հետաձգվեց մինչև 2013-ի աշուն, հետո՝ 2014-ի գարուն: Ապա նոր նախարար նշանակվեց, որն իր հերթին վերջնաժամկետ էր սահմանել, սակայն շենքը դեռ պատրաստ չէ: Արդարադատության փոխնախարար Սուրեն Քրմոյանը «Առաջին լրատվական»-ի հետ զրույցում ասաց, որ «Արմավիր» ՔԿՀ-ի առաջին մասնաշենքը շահագործման կհանձնվի առավելագույնը 1-2 ամսից՝ հավանաբար հոկտեմբերին: Հենց այդ մասնաշենք էլ կտեղափոխվեն բոլոր քրեակատարողական հիմնարկների այն դատապարտյալները, ովքեր իրենց պատիժը կրում են փակ և կիսափակ ռեժիմով:
Նշենք, որ «Արմավիր» ՔԿՀ-ի կառուցելու հիմնական նպատակը գործող քրեակատարողական հիմնարկներում առկա գերբեռնվածության խնդրի վերջնական լուծումն էր, որը հատկապես գերխնդիր է «Նուբարաշեն» ՔԿՀ-ում, որտեղից, եթե տեղափոխվեն ցմահները և կիսափակ ռեժիմում պատիժը կրող մյուս դատապարտյալները, գուցե գերբեռնվածության խնդիրը ինչ-որ չափով լուծվի, բայց ոչ վերջնականապես: Այսօր «Նուբարաշեն» ՔԿՀ-ում 8-10 հոգու համար նախատեսված խցում 17-18 դատապարտյալ է գտնվում, իսկ ցմահների թիվն այսօր 104 է: Եվ պարզ հաշվարկը ցույց է տալիս, որ խնդիրը վերջնականապես չի լուծվում:
Նշենք նաև, որ «Արմավիր» ՔԿՀ-ի առաջին մասնաշենքը, որը և պետք է առաջիկայում շահագործման հանձվի, նախատեսված է մոտ 400 դատապարտյալի համար: Յուրաքանչյուր խուց 16 քմ է, և բոլորը նույնանման են, նախատեսված են չորս անձի համար: Իսկ առհասարակ շենքն ամբողջությամբ նախատեսված է 1200 հոգու համար: Առաջին մասնաշենքի պատրաստ լինելուց և շահագործման հանձնելուց հետո, փոխնախարարի խոսքով, կսկսվի նաև մյուսների ավարտուն տեսքի բերելու գործընթացը:
«Քաղաքացիական հասարակության ինստիտուտ» հասարակական կազմակերպության նախագահ Արման Դանիելյանի խոսքով՝ ամեն դեպքում, «Արմավիր» ՔԿՀ-ի կառուցմամբ էլ Հայաստանում գերբեռնվածության խնդիրը չի լուծվելու: «Գուցե մյուս մասնաշենքերի կառուցման պարագայում ինչ-որ բան փոխվի, սակայն այս վիճակով՝ ոչ, խնդիրը չի լուծվելու: Պարզապես հույս կա, որ պայմանները քիչ թե շատ մարդկային կդառնան»,- «Առաջին լրատվական»-ի հետ զրույցում ասաց Դանիելյանը՝ հավելելով, որ իրականում ՔԿՀ-ների շենքերը չափազանց վատ վիճակում են: «Ֆիզիկապես այդ շենքներն այնքան վատ վիճակում են, որ վերանորոգումներն արդյունք չեն տալիս: Նույն «Նուբարաշենը» ինչքան ուզում է՝ նորոգեն, պայմանները դրանից ավելի լավը չեն դառնում: Այս դեպքում, իհարկե, նոր հիմնարկ կառուցելը միակ լուծումն է»:
Եվ հետո, Դանիելյանի խոսքով, գերբեռնվածության խնդիրը միայն նոր ՔԿՀ-ներ կառուցելով չի լուծվում: «Եթե խնդիր կա գերբեռնվածության հարցը լուծելու, ապա նոր հիմնարկ չպետք է կառուցվի, այլ պետք է շատ այլ մեթոդներ կիրառել գերբեռնվածությունը նվազեցնելու համար, օրինակ՝ կալանքը համատարած խափանման միջոց չընտրելը և շատ այլ միջոցներ»,- նկատեց մեր զրուցակիցը:
