«Ես ոչ միայն Բաքվում կիսատ թողած գործեր ունեմ, այլև աշխարհի լյուբոյ երկրում: Ով փորձի իմ երկրին, իմ պետությանը, իմ ժողովրդին վնասել, ես իրանց բան ունեմ ասելու»,- այսօր արտակարգ իրավիճակների նախարարությունում լրագրողների հետ զրույցում անդրադառնալով սահմանային վերջին լարվածություններին և իր Բաքու գնալու մասին հայտարարությանը՝ ասաց գեներալ Մանվել Գրիգորյանը՝ չմանրամասնելով, թե Բաքվում հատկապես ինչ էր անելու: «Հենց գնամ ընդեղ, կասեմ, կտեսնեք՝ ինչ կանեմ»,- ասաց նա:
Մանվել Գրիգորյանն ասաց, որ վտանգը միայն այսօր չէ, ինքը ամբողջ կյանքն է վտանգ զգում, քանի որ 4 կողմում անվստահելի հարևաններ են: «Մենք միշտ, 24 ժամ պետք է պատրաստ լինենք: Այսօր հայ մարդը պետք է պատրաստ լինի պաշտպանելու իրեն: Ես հիմա դրա վրա եմ աշխատում, որ հայ մարդը պատրաստ լինի»,- նկատեց Գրիգորյանը:
Նա, խոսելով Սոչիում կայացած հանդիպումից և դրանով պայմանավորված՝ հակառակորդի հարաբերական լռությանն անդրադառնալով, ասաց. «Ես մեր նախագահին դեռևս 25 տարի առաջ եմ ճանաչել, որ ինքը մեծ մարդ ա, մեծ հայրենասեր ա: Ես էդ պահին Հայաստանում չէի, բայց որ տեսա, այնքան հպարտացա, որ բոլորը մեր նախագահի մասին հիացմունքով էին խոսում»:
Պատասխանելով հարցին, թե այդ օրերին ինչո՞ւ էր «Երկրապահը» լռում, Մանվել Գրիգորյանը նկատեց. «Երկրապահները 25 տարի գնացել են դիրքեր ու մինչև հիմա դիրքերում են: Էս բանակը երկրապահն ա: Երկրապահը մի անգամ ա գնացել դիրք ու մինչև հիմա ըտեղա, չի իջել»:
Մանվել Գրիգորյանը, անդրադառնալով այն հարցին, թե հասարակության շրջանում մտավախություն կա, որ պատերազմի վերսկսման պարագայում օլիգարխները, նրանց զավակները չեն մասնակցի այդ գործողություններին, նկատեց. «Մասնակցելու են, ո՞նց չեն մասնակցի, սաղին կտամ, դեմս կքշեմ, կտանեմ ընդե: Էն վախտ էլ եմ տարե, ընենց մարդ չի մանցել, որ ընձնից փախել ա»:
Առացել մանրամասն՝ տեսանյութում:
