Կոտայքի մարզի ընդհանուր իրավասության դատարանում Յուրի Բաղդասարյանի նախագահությամբ ավարտվել է Աշոտ Իսախանյանի գործի դատական քննությունը:
Նախկինում 9 անգամ դատապարտված 38-ամյա Աշոտ Իսախանյանը, ըստ դատական ակտի, բնակվել է Հրազդան քաղաքում: Չի աշխատել, հիմնական զբաղմունք չի ունեցել: Եղել է երկկողմանի ծնողազուրկ և երրորդ խմբի հաշմանդամ:
Նախկինում նա դատապարտվել է տարբեր բնույթի հանցագործությունների, այդ թվում՝փաստաթղթեր կեղծելու, պաշտոնատար անձի կոչումն ինքնակամ յուրացնելու և խաբեությամբ հափշտակություններ կատարելու համար:
Հերթական պատիժը կրելուց հետո 2012 թվականի մայիսի 4-ին Իսախանյանն ազատվել է կալանավայրից:
Ազատության մեջ հայտնվելով՝ նա համակարգչային եղանակով պատրաստել է իր տվյալներով լրացված, իրավունք վերապահող ակնհայտ կեղծ փաստաթղթեր՝ ՀՀ ՊՆ 4-րդ բանակային միավորման հրամանատարի և «Սյունիքի աշխարհազոր» կազմակերպության նախագահի կեղծ վկայականներ:
2012 թվականի մայիսի 31-ից մինչև օգոստոսի 6-ը խաբեությամբ, ազատամարտիկ Ռ. Ղուկասյանի ընտանիքին ֆինանսական աջակցություն ցուցաբերելու, նրա գերեզմանաքարը պատրաստելու, զինված ուժերին ֆինանսական օգնություն ցուցաբերելու պատրվակով Աշոտ Իսախանյանը, օգտագործելով կեղծ վկայականները, ներկայանալով որպես գեներալ-մայոր, շարունակաբար փորձել է տարբեր անձանցից ու կազմակերպություններից հափշտակել 870 հազար դրամ:
Աշոտ Իսախանյանի խարդախությունները բացահայտվել են: Հարուցվել է քրեական գործ:
Իսախանյանը կալանքի տակ է առնվել:
Նախաքննության ավարտին նա պահանջել ու ստացել է քրեական գործում առկա փաստաթղթերի, այդ թվում՝ տարբեր կազմակերպություններին հղած իր դիմումի և իր կեղծ վկայականների պատճենները: Դրանք նա օգտագործել է հետագա խարդախությունների համար՝ արդեն կալանավայրում գտնվելու ընթացքում:
Կենտրոն և Նորք-Մարաշ վարչական շրջանների ընդհանուր իրավասության դատարանի՝ 2013 թվականի հունվարի 11-ի դատավճռով Աշոտ Իսախանյանը դատապարտվել է 4 տարի ազատազրկման:
Գործի քննության ընթացքում՝ մինչև դատավճռի հրապարակումը՝ 2012 թվականի մայիսի 22-ին, Իսախանյանը «Նուբարաշեն» ՔԿՀ-ից տեղափոխվել է «Սևան» ՔԿՀ:
Մայիսի վերջերին նա կալանավայրից հեռախոսով ծանոթացել է Գորիսի բնակչուհի Բ.-ի հետ:
2013 թվականի սեպտեմբերի 17-ին կալանավայրում պատիժ կրող Աշոտ Իսախանյանն ամուսնացել է Բ.-ի հետ:
Իր մոտ ունենալով «գեներալ-մայորի» կեղծ վկայականի ու տարբեր կազմակերպություններին ուղարկած դիմումի պատճենները՝ Իսախանյանը «Սփյուռ» տեղեկատու ծառայությունից ճշտել է Հայաստանի Հանրապետությունում և Արցախում գտնվող ֆիզիկական անձանց ու կազմակերպությունների հասցեները, անձնական տվյալները:
Նա դիմումի ձևի վրա իր ձեռքով ավելացրել է կազմակերպության անվանումը, տնօրենի անուն-ազգանունը, հասցեն, նշել, թե որ հաշվեհամարին պետք է գումար փոխանցվի: Ստորագրել ու ծրարների մեջ է դրել այդ դիմումները, ուղարկել հասցեատերերին՝ գումարներ խնդրելով զինված ուժերին աջակցելու, ազատամարտիկի գերեզմանաքարը պատրաստելու խնդրանքով:
Իսախանյանը խաբեությամբ մինչև նոյեմբերի 15-ն ընկած ժամանակահատվածում շարունակաբար «Որոտան ՀԷԿ» ՓԲԸ-ից, Թալինի, Իջևանի, Տաշիրի քաղաքապետարաններից, Կապանի բարեգործական հիմնադրամից, «Արմավիրի հաստոցաշինական գործարան» ԲԲԸ-ից, «Մեղրու ՃՇՇՁ» ՍՊԸ-ից, «Մեխտրանս» ԲԲԸ-ից, «Կապանի լեռնագործներ» ՍՊԸ-ից, «Գլաձոր առողջարան» ՓԲԸ-ից, «Ավստրալիա-Նաիրի» ՍՊԸ-ից, «Թեղուտ» ՓԲԸ-ից, Երևանի պետական համալսարանից, «Թունել» ՓԲԸ-ից, այլ ընկերություններից ու անհատ մարդկանցից ստացել է ընդհանուրը՝ 985 հազար դրամ գումար:
Գումարը կանխիկացվել է Գորիսում գտնվող «Արարատբանկ» ԲԲԸ մասնաճյուղում Իսախանյանի կնոջ՝ Բ.-ի անունով բացված հաշվեհամարից՝ բանկային քարտի միջոցով:
Գումարները փոխանցվել են կալանավայրում գտնվող Իսախանյանին, նա էլ հափշտակել է դրանք ու ծախսել իր կարիքների համար:
Կոտայքի մարզի ընդհանուր իրավասության դատարանում ինքնակոչ «գեներալ-մայորի» գործը, նրա միջնորդությամբ, քննվել է արագացված ընթացակարգով: Աշոտ Իսախանյանն իրեն մեղավոր է ճանաչել լիովին:
Ընդհանուր իրավասության դատարանը Աշոտ Իսախանյանին մեղավոր է ճանաչել ու դատապարտել 5 տարի ազատազրկման:
Այս պատժին մասնակիորեն գումարել է նախորդ պատժի չկրած մասը և վերջնական պատիժ է սահմանել 6 տարի 6 ամիս ազատազրկում:
Պատժի սկիզբը՝ 2014 թվականի օգոստոսի 1-ից:
