Թուրքիայի Կենտրոնական ընտրական հանձնաժողովը հրապարակել է օգոստոսի 10-ին կայացած նախագահական ընտրությունների վերջնական պաշտոնական արդյունքները: ԿԸՀ-ի ղեկավար Սադի Գյուվենի հայտարարության համաձայն՝ Թուրքիայի 12-րդ նախագահ է ճանաչվել վարչապետ Ռեջեփ Թայիփ Էրդողանը, գրում է ITAR-TASS-ը:
«Թայիփ Էրդողանի ընտրվելու մասին պաշտոնական ապացույցներն ու ընտրությունների արդյունքները կփոխանցվեն խորհրդարանի խոսնակ Ջեմիլ Չիչեկին»,-հայտնել է Գյուվենը: Դրանից հետո մեջլիսի նախագահը կընդունի վարչապետի հրաժարականը:
ԿԸՀ-ի տվյալներով՝ Էրդողանը հավաքել է ձայների 51.8%-ը: Պաշտոնապես նախագահի պաշտոնին նա կանցնի օգոստոսի 28-ին և այդ պաշտոնում կփոխարինի Աբդուլահ Գյուլին: Էրդողանը երկրի առաջին նախագահն է, որն ընտրվել է ուղիղ համաժողովրդական քվեարկությամբ: 1923 թվականից սկսած՝ Թուրքիայի նախագահ էր ընտրում երկրի խորհրդարանը:
Թուրքիայի նախագահի լիազորությունների ժամկետը հինգ տարի է, որի ընթացքում, վերլուծաբանների կարծիքով, Էրդողանը կշարունակի իրագործել իր վարչապետության օրոք սկսած ծրագրերը, մասնավորապես՝ քրդական հարցի կարգավորումը և ժողովրդավարական սահմանադրության նախապատրաստումը: Նոր հիմնական օրենքը, փորձագետների կարծիքով, կարող է հիմնովին փոխել Թուրքիայում կառավարելու ձևը: Էրդողանն ավելի վաղ արտահայտվել էր նախագահական լիազորությունները ամրապնդելու մասին՝ ներմուծելով խառը կամ խորհրդարանի հետ միասին նախագահական կառավարման ձև: Դա բխում է որպես երկրի նախագահ նրա նպատակներից, քանի որ նախագահի լիազորությունները այս պահին խիստ սահմանափակ են: