Ագրարային համալսարանի ղեկավարությունը համաձայն չէ ՕԵԿ պատգամավոր Հովհաննես Մարգարյանի բերած հակափաստարկների հետ, թե իրենց ու ՕԵԿ-ի միջև վիճահարույց տարածքը հենց կուսակցությանն է պատկանում:
Պրոռեկտոր Պարույր Էֆենդյանն այսօր լրագրողների հետ հանդիպման ժամանակ նշեց, որ այս կոնֆլիկտը պետք է լուծվի մինչև սեպտեմբերի 1-ը, քանի որ իրենք Համաշխարհային բանկի օժանդակությամբ գյուղտեխնիկա են ստացել և պետք է տեղակայեն հենց այդ տարածքում:
«Դեռ 1933թ.-ին Աղասի Խանջյանի հրամանով շենքը տրամադրվել է համալսարանին: 2002թ.-ին, երբ համալսարանի կարգավիճակը փոխվեց, հարակից շենք-շինությունները կառավարությունը տրամադրեց բուհին, քանի որ այդ տարածքն անժամկետ և անհատույց օգտագործման պայմանով տրվել էր համալսարանին: Իսկ ՕԵԿ-ին հարակից հողը հատկացրել է կառավարությունը, իրենք կառուցել են չորսի փոխարեն ութհարկանի շենք: Շինարարության ընթացքում իրենք կառուցել են նաև ավտոտնակ և կաթսայատուն: Հետո ՕԵԿ-ը դիմել է համալսարանին խնդրանքով՝ տրամադրել տարածք ավտոկայանի համար: Քանի որ այդ տարածքը մերն է, մենք տրամադրեցինք՝ մտածելով, որ ոչ ոք չի կարող ոտնձգություն կատարել տարածքի նկատմամբ:
Պարզվեց, որ եղել է որոշում, որ ավտոտնակի և կաթսայատան տարածքը տրամադրվել է ՕԵԿ-ին: Կա որոշում, կա կադաստրի թույլտվություն, բայց մենք դիմել ենք դատարան, քանի որ դա մեր տարածքն է»,- ասաց Էֆենդյանը՝ հավելելով, որ իրենց տարածքի նկատմամբ հետաքրքրությունը առաջացավ միայն այն բանից հետո, երբ ՕԵԿ-ը սկսեց քանդել կառուցված շինությունը, ինչպես նաև, երբ իրենք ստացան վերը նշված գյուղտեխնիկան:
«Ստացվել է, որ մենք բարություն ենք արել, տարածքը տրամադրել ենք, հիմա մենք Համաշխարհային բանկի ծրագրով սարքավորումներ ենք ստացել, որոնք պետք է տեղադրվեն այնտեղ, բայց մեզ թույլ չեն տալիս: Նույնիսկ ՕԵԿ-ի պատգամավորները չեն հասկանում, որ դա ուսումնական օջախ է»,- իր խոսքում նշեց համալսարանի մեկ այլ պրոռեկտոր Յուրի Մարմարյանը:
Էֆենդյանի խոսքով՝ այս խառնաշփոթն առաջացել է այն բանից հետո, երբ կառավարության որոշմամբ իրենց հատկացված տարածքն ավելի ուշ՝ արդեն քաղաքապետ Երվանդ Զախարյանի որոշմամբ հատկացվել է ՕԵԿ-ին:
Պրոռեկտորները չեն շտապում մեղադրել նախկին քաղաքապետին կամ կառավարությանը, պարզապես ՕԵԿ-ից պահանջում են շինարարություն չիրականացնել, մինչև դատարանում քննվի իրենց հայցապահանջը՝ չեղյալ համարել նախկին քաղաքապետի որոշումը:
