Ջերմաստիճանի բարձրացումը և սառցադաշտերի հալչումը ջրհեղեղներով և սողանքներով է սպառնում Ասիային։
Տիբեթի սառցադաշտերը, որոնք ջրով են ապահովում Ասիայի միլիոնավոր բնակիչների, վերջին կես դարում առավելագույն ջերմաստիճանի են հասել երկու հազար տարվա ընթացքում։ Այդ մասին ասվում է Չինաստանի գիտությունների ակադեմիայի Տիբեթական բարձրավանդակի ուսումնասիրման ինստիտուտի զեկույցում, հինգշաբթի հաղորդում է Reuters-ը։
Ինչպես նշված է, այդպիսի իրավիճակը սպառնում է սառցադաշտերի նահանջումով և տարածքների ամայացմամբ։ «Վերջին 50 տարում ջերմաստիճանի բարձրացման տեմպերը կրկնակի գերազանցել են համաշխարհային միջին մակարդակը»,- ասվում է հաղորդագրությունում։
Սառցադաշտերի մակերեսի փոքրացումը կարող է խաթարել ջրի հոսքն Ասիայի գլխավոր գետեր, որոնք սկսվում են Տիբեթյան բարձրավանդակում, այդ թվում նաև չինական Խուանխեն և Յանցզին, հնդկական Բրահմապուտրան, ինչպես նաև Սալուին և Հնդկաչին թերակղզու Մեկոնգ խոշորագույն գետը։
Ինչպես հաղորդել են չին գիտնականները, այս տարվա մայիսին վերջին 30 տարում տիբեթյան սառցադաշտերը փոքրացել են 15%-ով՝ կորցնելով մոտ 8000 խոր. կմ մակերես։
Նոր զեկույցում ասվում է, որ կլիմայական փոփոխությունները և բարձրավանդակի անտրոպոգեն ազդեցությունը, մեծ հավանականությամբ ջրհեղեներ և սողանքներ կառաջացնեն այդ շրջանում։ Այդուհանդերձ, ինչպես նշում են գիտնականները, տաքացումը բարենպաստորեն կանդրադառնա տեղի էկոհամակարգի վրա։
