Ստալինի կիսանդրին, որը տեղադրվել էր Թելավի շրջանի Ակուրա գյուղում (արևելյան Վրաստան)՝ մի խումբ բնակիչների կողմից, ապամոնտաժել են երեքշաբթի երեկոյան ու տարել շրջանային վարչակազմի շենք՝ հայտնում է «Նովոստի-Գրուզիան»:
Թելավիի քաղաքային շրջանի ղեկավար Ալեքսանդր Շատիրիշվիլիի խոսքով՝ քանի որ հուշարձանը տեղադրվել է ինքնակամ ու առանց թույլտվության, դա համարվում է օրենքի խախտում:
Սակայն ոչ մի տուգանք չի կիրառվի, քանի որ հայտնի չէ, թե գյուղի կենտրոնում հատկապես ով է տեղադրել կիսանդրին:
Միևնույն ժամանակ՝ գյուղի բնակիչների մի մասը լրագրողներին հայտնել է, որ իրենք դեմ են հուշարձանի ապամոնտաժմանը, ու խոստացել են, որ գյուղացիները գումար կհավաքեն Ստալինի նոր կիսանդրի ձեռք բերելու համար:
Վերջին 2 տարում Ակուրայում արդեն մի քանի անգամ տեղադրվել է Ստալինի կիսանդրին:
