Բրիտանիայի յուրաքանչյուր տասներորդ բնակիչը մոտ ընկեր չունի, գրում է The Independent-ը՝ հղում անելով Relate բարեգործական կազմակերպության ուսումնասիրությանը: Փորձագետներն ուսումնասիրել են YouGov հարցման արդյունքները, որին ավելի քան 5 հազար մարդ է մասնակցել, և որը նվիրված է եղել բրիտանացիների անձնական կյանքի տարբեր ասպեկտներին:
Պարզվել է, որ բնակչության 10%-ը մոտ ընկեր չունի: Վիճակագրական այս ցուցանիշների պատճառ կարող է դառնալ այն փաստը, որ ավելի շատ մարդիկ են երկրով մեկ տեղափոխվում և ընկերներից հեռու հայտնվում, ասվում է հոդվածում: Ինչպես կարծում է Օքսֆորդի համալսարանի պրոֆեսոր Ռոբին Դանբարը՝ այս միտումը զարգացել է վերջին 60 տարիներին: «Երկրորդ համաշխարհային պատերազմի ավարտից հետո մարդիկ ավելի ու ավելի շարժուն են դարձել»,- նշում է նա:
Դանբարի անձնական ուսումնասիրության համաձայն՝ բրիտանացիների գրեթե 5%-ը միայն մեկ մտերիմ ունի, ընդ որում նա ոչ թե ընկեր է, այլ ավելի հաճախ ընտանիքի անդամ:
