«Ես չեմ տեսնում դիվանագիտական որևէ առաջընթաց Ղարաբաղում, և ինձ թվում է, որ գործընթացն ավելի շատ հետընթաց է ապրում»,- «168 ժամ»-ի թղթակցի հետ հարցազրույցում ասել է «Ամերիկյան արտաքին քաղաքականության խորհրդի» ավագ վերլուծաբան Ուեյն Մերրին:
«Այս պարագայում խաղաղության հաստատման միակ պոտենցիալը տարածաշրջանային երկու ուժերի` Ռուսաստանի և Թուրքիայի միջև համագործակցությունն է, որի արդյունքում կարող է լինել լուծում, որը հիմնված չի լինի միջնորդության վրա,- նշել է վերլուծաբանը,- Պատերազմը վատ կլինի բոլորի համար, բայց լուծումը պատերազմն է: Վերջին տարիներին ես այսպիսի վերաբերմունք տեսնում եմ երկու կողմերից էլ` և´ հայերից, և´ ադրբեջանցիներից: Եթե սա է նրանց վերաբերմունքը, ուրեմն ժամանակն է, որպեսզի տարածաշրջանային գերտերությունները հյուսիսից և արևմուտքից վերցնեն պատասխանատվությունն իրենց վրա և կանխեն պատերազմը»:
Իսկ հարցին` այդ դեպքում ի՞նչ է անելու ԱՄՆ-ը` պատերազմը կանխելու համար, Ու.Մերրին պատասխանել է. «Մենք չափից ավելին ենք արել, մենք չափից ավելի ակտիվ ենք եղել և սպասումներ ենք ստեղծել և´ Երևանում, և´ Բաքվում, թե ամերիկացիները լուծելու են այս խնդիրը: Բայց ամերիկացիները չեն պատրաստվում լուծել այս խնդիրը, դուք պետք է լուծեք այն, բայց դուք չեք ուզում: Ես չեմ տեսնում որևէ հիմք, որի վրա ամերիկյան դիվանագիտությունը կարող է որևէ առաջընթաց ունենալ: Ժամանակն է, որ ԱՄՆ-ը ձեռքերը լվանա Ղարաբաղից»: Այդ դեպքում կգա Ռուսաստա՞նը: Այս հարցադրմանն ի պատասխան` ամերիկացի վերլուծաբանն ասել է. «Ուրեմն հաջողություն եմ մաղթում նրան (անգլերեն` good luck- խմբ.)»:
