Ճապոնիայում ամռան սկզբից շոգից տուժածների թիվը գերազանցել է 30 հազարը: Այս մասին հայտնում է NHK հեռուստաալիքը:
Պաշտոնական տվյալներով՝ վերջին շաբաթվա ընթացքում շոգից 8 մարդ է մահացել, ևս ավելի քան 4000-ը հոսպիտալացվել են: Այսպիսով՝ զոհերի թիվն անցած շաբաթվա համեմատ 20 տոկոսով կրճատվել է: Դա կապված է «Հալոնգ» թայֆունի ազդեցության հետ, որի շնորհիվ օդի ջերմաստիճանը հանգստյան օրերին նվազել է՝ հասնելով 27-28 աստիճան Ցելսիուսի: Հաղորդվում է, որ միայն մայրաքաղաք Տոկիոյում ամռան ընթացքում շոգից մահացել է ավելի քան 30 մարդ:
Երկրի օդերևութաբանական վարչությունը նախազգուշացնում է այս շաբաթ ջերմաստիճանի նոր բարձրացման մասին: Իշխանությունները բնակիչներին զգուշության կոչ են արել, խորհուրդ տվել երկար չմնալ բաց արևի տակ և շատ ջուր խմել:
