Գերմանիայի խոշորագույն Deutsche Bank բանկը մեղադրվում է 2008-2009 թթ. ֆինանսական ճգնաժամի ընթացքում 12 միլիարդ դոլար ծավալով չիրացված կորուստները թաքցնելու համար,- հաղորդում է Reuters-ը:
2010-2011 թթ. վարկային կազմակերպության երեք նախկին աշխատակիցներ բողոք են ներկայացրել ԱՄՆ-ի կարգավորիչ մարմիններին, որոնցից հետևում է, որ Deutsche Bank-ը հաշվապահական հնարքներ է կիրառել «12 միլիոն դոլար ծավալով վարկային դերիվատիվների կորուստները թաքցնելու համար»:
Բանկի ներկայացուցիչները հերքել են ոչ ստույգ հաշվետվության կասկածանքները:
«Ֆինանսական տվյալները կեղծելու ավելի քան 2.5 տարի վաղեմություն ունեցող կասկածանքներն արդեն դարձել են մանրամասն հետաքննության առարկա և որևէ հիմք չունեն»,- գործակալությանը հայտարարել է բանկի պաշտոնական ներկայացուցիչը:
Deutsche Bank-ը խոշորագույն բանկային կոնցեռն է Գերմանիայում: Բանկը հիմնվել է 1870 թ.: Այն իր մեջ ներառում է կոմերցիոն, հիփոթեքային և ներդրումային բանկեր:
