Ավան և Նոր Նորք վարչական շրջանների ընդհանուր իրավասության դատարանում Արմեն Վարդապետյանի նախագահությամբ սկսվում է Հեղինե Հարթենյանի գործի դատական քննությունը:
Ըստ մեղադրանքի՝ Հեղինեն Ավանում գտնվող իր բնակարանը 2009-2010 թվականներին պարբերաբար տրամադրել է Նաիրա Պ.-ին՝ պոռնկությամբ զբաղվելու և ստացած եկամուտը հավասարաչափ բաժանելու պայմանավորվածությամբ:
Մարմնավաճառությամբ ստացված եկամուտը կիսել են, սակայն Նաիրան մի օր էլ Հեղինեի տնից գողություն է կատարել: Այդ փաստը բացահայտվել է, Նաիրան դատվել ու դատապարտվել է:
Գողությամբ իրեն պատճառված վնասը հատուցելու պահանջով Հեղինեն Նաիրային դարձյալ առաջարկել է իր բնակարանում զբաղվել մարմնավաճառությամբ, ստացած գումարներով հատուցել իրեն պատճառած վնասը:
2013 թվականի նոյեմբեր-դեկտեմբեր ամիսներին Հեղինեն այդ նպատակով Նաիրային է տրամադրել իր բնակարանը և տնօրինել նրա ստացած գումարները:
Հեղինե Հարթենյանին մեղադրանք է առաջադրվել պոռնկությանը նպաստելու համար՝ ՀՀ քրեական օրենսգրքի 262 հոդվածի 1-ին մասով:
Հարթենյանի խափանման այլընտրանքային միջոցը գրավն է:
Այսօրվա նիստին չէր ներկայացել գրավով ազատության մեջ գտնվող ամբաստանյալը: Չէր ներկայացել պաշտպանը, ով գրությամբ հայտնել էր, թե դատական նիստի օրվա մասին տեղեկացել է միայն այսօր, չի կարող մասնակցել՝ այլ նիստ վաղօրոք նշանակված լինելու պատճառով:
Նիստին ներկա չէր նաև մեղադրողը:
Ներկայացել էին երկու վկաներ՝ ինքը՝ Նաիրա Պ.-ն ու Ալեքսան անունով մի երիտասարդ:
Նաիրան դժգոհեց, որ այսօր ժամը չորսի նիստի մասին ծանուցագիրը ստացել է այսօր ժամը տասներկուսին: Ինքը կարող էր տանը չլինել ու չստանալ ծանուցագիրը:
Ծանուցագրի գրման ամսաթիվ էր նշված հուլիսի 21-ը: Թե ինչ դժվարին ճանապարհով է անցնում Ավան և Նոր Նորք վարչական շրջանների ընդհանուր իրավասության դատարանից Ավան վարչական շրջանում ապրող բնակչին հասցեագրված նամակը, որ տեղ է հասնում ինն օրում, հայտնի չէ: Ըստ փոստային կնիքի՝ նամակը փոստային բաժանմունքում ստացվել էր այսօր:
Հաջորդ դատական նիստը տեղի կունենա սեպտեմբերի 16-ին: