Թբիլիսիում բացվել է արտերկրի վրացական դիվանագիտական առաքելությունների ղեկավարների համաժողովը: Դրան այս անգամ մասնակցել է երկրի ողջ բարձրագույն ղեկավարությունը: Համաժողովի գլխավոր թեմաներից մեկը ՆԱՏՕ-ի և ԵՄ-ի հետ հետագա մերձեցման պայմաններում Ռուսաստանի հետ հարաբերությունների նորմալացման կուրսի պահպանումն է: Այս մասին գրում է Kommersant-ը:
Արտերկրի վրացական դիվանագիտական առաքելությունների ղեկավարներին Թբիլիսիում հավաքում են ամեն տարի: Սակայն այս անգամ՝ ուկրաինական ճգնաժամի, ԵՄ-ի հետ Ասոցացման համաձայնագրի ստորագրման և սեպտեմբերին Մեծ Բրիտանիայում կայանալիք ՆԱՏՕ-ի գագաթնաժողովի ֆոնին համաժողովը եղել է ամենաներկայացուցչականը՝ համեմատած այլ տարիների հետ: Հենց առաջին օրը դեսպանների առջև ելույթ են ունեցել նախագահը, վարչապետը, արտգործնախարարը:
Համաժողովի առանցքային թեմաներից մեկը նվիրված էր Ռուսաստանի հետ Վրաստանի հարաբերություններին: «Վրաստանն անում է ամեն ինչ՝ փոխադրելու Ռուսաստանի հետ հարաբերությունները կառուցողական հուն»,- հիշեցրել է Վրաստանի նախագահ Գեորգի Մարգվելաշվիլին: Նրա խոսքով՝ Թբիլիսիի քաղաքականությունն ուղղված է նրան, որպեսզի իրապես փոխի Մոսկվայի հետ հարաբերությունների պարադիգման և տեղափոխի դրանք տնտեսական և տարածաշրջանային զարգացման հարթություն:
Նախագահը դեսպաններին հանձնարարել է ակտիվորեն ծանոթացնել արևմտյան գործընկերներին Ռուսաստանի հանդեպ Վրաստանի նոր քաղաքականության հետ:
Միևնույն ժամանակ նախագահ Մարգվելաշվիլին վրացի դեսպաններին հիշեցրել է ՆԱՏՕ-ի գագաթնաժողովին ջանասիրաբար պատրաստվելու անհրաժեշտության մասին՝ հասնելու Աֆղանստանում դաշինքի օպերացիայում վրացական զորակազմի ակտիվության և ժողովրդավարական ձեռքբերումների դիմաց առավելագույն վերադարձի:
