Ֆինանսների նախարարության ֆինանսական վերահսկողության տեսչությունը քաղաքաշինության նախարարության պատվերով մարզերում ստուգել է հիմնանորոգվող 16 օբյեկտներ, 3-ը` մշակութային օբյեկտներ և 13-ը` դպրոցներ: Այդ բոլոր օբյեկտներում հայտնաբերվել են խախտումներ` ընդհանուր 2.4 մլրդ դրամ հատկացումներից 670 մլն դրամի կորուստ է արձանագրվել:
Այսօր լրագրողների հետ հանդիպմանը ֆինանսների նախարարության ֆինանսական վերահսկողության տեսչության պետ Սոնա Ղարիբյանը տեղեկացրեց, որ տույժերը 23 մլն դրամից ավելի են, 109 մլն դրամը վճարվել է, սակայն աշխատանք չի կատարվել: Օրինակ՝ Կապանի քոլեջում կապալառուն ստացել է 64 մլն դրամ, բայց չի կատարել աշխատանք: Ս. Ղարիբյանը նշեց, որ ստուգված օբյեկտներում հիմնանորոգման աշխատանքները շարունակական բնույթ են կրում:
«Խախտումները կարևորում ենք: Դրանք համատարած բնույթ են կրում: Տեղի է ունեցել պետական միջոցների փոշիացում, անգամ մեկ դպրոցի փլուզման դեպք է գրանցվել»,- ասաց Ս. Ղարիբյանը՝ նշելով, որ դեպքը եղել է Սյունիքի մարզի Տեղ գյուղում, որի կապալառուն «Առվա երկիր» ՍՊԸ-ն է, նախագծողը՝ Յաշա Խաչյանը:
Մեծ Մանթաշի և Մասիսի դպրոցների հիմնանորոգումն իրականացրել է «ՆՄ Օհանյան» ՍՊԸ-ն, որի գործերն ուղարկվել են գլխավոր դատախազություն, հարուցված են քր.գործեր, ընթանում է քննություն: Ս.Ղարիբյանի խոսքով` այդ «ՆՄ Օհանյան»-ը նույն «Փարվանա մոնտաժ»-ն է, որը ոչ վաղ անցյալում նույնպես իրավախախտումներ է թույլ տվել, և այժմ ընկերության ղեկավարները հետախուզման մեջ են: Քաղաքաշինության նախարարությունում արդեն գոյություն ունի սև ցուցակ:
Ս. Ղարիբյանը հայտնեց նաև, որ լիազոր մարմնին պարտադրում են համապատասխան միջոցներ ձեռնարկել և գումարները վերականգնել: