Թուրքական Hürriyet թերթին տված հարցազրույցի ժամանակ Իրաքի վարչապետ Նուրի Ալ-Մալիքին անդրադարձել է թուրք-իրաքյան հարաբերությունների կարգավորման խնդրին.
«Մենք ցանկանում ենք կարգավորել Թուրքիայի հետ հարաբերությունները՝ պայմանով, որ նա չմիջամտի երկրի ներքին գործերին: Մենք էլ մեր հերթին չենք միջամտի Թուրքիայի ներքին գործերին և կարող ենք ամեն ինչ սկսել զրոյից: Իրաքն ու Թուրքիան ունեն շատ մոտ հարաբերություններ: Սկիզբը շատ լավ սկսեցինք:
Թուրքիան շատ մեծ դեր է խաղացել Իրաքի տնտեսության զարգացման մեջ: Թուրքիայի հետ մեր առևտրի ծավալը գերազանցել է մյուս երկրների հետ առևտրային ծավալը: Դժբախտաբար, այսօր մենք հասել ենք այս կետին, որը ո՛չ գոհացնում է մեզ, ո՛չ էլ Թուրքիային: Մենք ցանկանում ենք նորովի սկսել Թուրքիայի հետ մեր քաղաքական հարաբերությունները:
Անհրաժեշտ է, որ տարածաշրջանի երկրների կառավարությունները չմիջամտեն միմյանց ներքին գործերին: Իրաքում բնակվում են տարբեր էթնիկ խմբեր, որոնք խոսում են տարբեր լեզուներով: Նույն վիճակն է նաև Թուրքիայում, Իրանում ու Սիրիայում: Անհրաժեշտ է հարգանք ցուցաբերել բոլոր փոքրամասնությունների ու լեզուների հանդեպ և դրա հետ մեկտեղ պահպանել հայրենիքը, հանրապետությունը: Եթե Սիրիան մասնատվի, Իրաքն էլ կմասնատվի, իսկ եթե Իրաքն էլ մասնատվի, ապա Թուրքիան էլ կմասնատվի»:
